اسلام آباد۔ 17 دسمبر (اے پی پی) وزیراعظم عمران خان ای کورٹ آن عدالتی کارروائی چلیفنگ نا گام ءِ ستاکڑزوک گوندسا پارینے کہ ای کورٹ نا کمک اٹ کارروائی ٹی شرفمند آ عدالت نا نہادی وخت و پیسہ ہڑتوم آتا بچت مریک، شوکت خانم ٹرسٹ دنیاٹی یکتا و اسٹ انگا مفت کینسر نا درمان نا ہسپتال اس چلیفنگ ءِ، داوڑنا آسودہی ڈٹءِ بے بنداو و سٹی دوبہ خلسا سیاست کن کاریم اٹ اتنگ است ہسونی نا سوب ءِ۔ جمعہ نادے آ وزیراعظم میڈیا آفس آن جاری بیان نا رداٹ وزیراعظم پارے کہ عدالت نا ای کورٹ آن کارروائی کورٹ کیس آتے وخت اٹ سرتننگ اٹ کمکار مریک، ای کورٹ نا تعارف و کارروائی سرسہب وڑاٹ عمل اٹ بننگ آ عدلیہ و حکومتی ادارہ غاک تحسین نا حقدار ءُ، شوکت خانم ٹرسٹ آ مخلوق نا پت جوڑ ءِ۔ وزیراعظم پارے کہ شوکت خانم ٹرسٹ دنیا ٹی یکتا و اسٹ انگا مفت کینسر نا درمان نا ہسپتال اس چلیفنگ ءِ، داوڑنا آسودہی ڈٹ ءِ بے بنداو و سٹی دوبہ خلسا سیاست کن کاریم اٹ اتنگ است ہسونی ناسوب ءِ، عدالت آن اومیت ءِ کہ داوڑنا دوبہ غاتیا بے مٹ ءُ فیصلہ اس ترسا آخبت کن داروایت ءِ چٹفنگ اٹ کمک کیک۔ وزیراعظم نا کنڈآن ایڈیشنل ڈسٹرکٹ و سیشن جج محمد عدنان نا عدالت اٹ مسکوہی وزیر دفاع خواجہ آصف نا وزیراعظم عمران خان آ شوکت خانم میموریل ٹرسٹ انا فنڈ اٹی غیر شفافیت، منی لانڈرنگ و بے پن کمپنی تا کاریم اٹ اتنگ کون آ بے بنداو و دروغ انا دوبہ غاتا برخلاف دائر 10 ارب روپئی نا جرمانہ نا کیس انا سماعت مس۔ یکم اگست 2012آ خواجہ آصف اول پنجاب ہاؤس اٹ اڈ ہلوک تینا پریس کانفرنس اٹ دادوبہ غاتے خلک و اوکان پد ہندادے شام انا نجی ٹی وی نا اسہ پروگرام اسے ٹی داسٹی دوبہ غاتے دُوارہ پارے۔ وزیراعظم خواجہ آصف نا برخلاف دائر ہتک عزت نا کیس اٹ تینا وکیل سینیٹر ولید اقبال نا ساڑی گری ٹی تینا دفتر آن ای۔ کورٹ نا کمک اٹ ایڈیشنل ڈسٹرکٹ و سیشن عدالت اسلام آبادنا کارروائی ٹی بشخ ہلک۔ وزیراعظم بیان حلفی جمع کرفے ہراٹی دا دوبہ غاتے دروغ، سٹی و ہتک آمیز گوندا۔ بیان حلفی ٹی مستی پاننگاکہ 1991آن 2009 اسکان عمران خان شوکت خانم نا غٹ آن بھلا انفرادی ڈونر ئس و پیدوار کرے کہ شوکت خانم ٹرسٹ انا زرکاری اسکیم تا بابت فیصلہ سازی ایکسپرٹ کمیٹی کریکہ ہراٹی وزیراعظم عمران خان نا ہچ وڑنا مداخلت اس اَلوکہ۔ داکان بیدس شوکت خانم نا ہرا زرکاری اسکیم تا بابت دا بے بنداو و سٹی آ دوبہ غاتے خلنگا اوپورو وڑاٹ بیدس نسخان اسے نا شوکت خانم ٹرسٹ پدی وصول کرے۔ وزیراعظم نا بیان حلفی ٹی دا ہم پیدوار کننگا کہ داوڑنا من گھڑت و بے بنداو دوبہ غاتا سیبو ءِ ہلسا قومی میڈیا نا کمک اٹ الس نا شوکت خانم ٹرسٹ آ پت ءِ ٹھیس تننگ نا کوشست کننگا۔
