اسلام آباد۔ 17 دسمبر (اے پی پی) وزیرخارجہ شاہ محمود قریشی پارینے کہ او آئی سی مسلم دنیا ءِ مون تروک چندی چیلنج خاص وڑاٹ اسلاموفوبیا ، امن وسلامتی و جھیڑہ غاتا ایسر کننگ نا چرجوئی ٹی گچین ءُ تنظیم اسے نا وڑاٹ تینا کڑد ءِ ادا کیک، اوغانستان اٹی زرگزرانی بھسکاری نا اثر ہمسایہ ملک ، ڈیہہ و ایلو دنیا غا مرتب مریک، جہانی برادری، مقبوضہ جموں و کشمیر اٹی انسانی حق انا بھلا خلاف ورزی کروک بندغ آتا جوابدہی و مواخذہ کن گام گیج کے۔ داہیت آتے او سیکرٹری جنرل او آئی سی حسین ابراہیم طہٰ تون پارے ہرا ڈل اتون اوار اوڑتون وزارت خارجہ ٹی اوڑدہی کرے۔ ترجمان دفترخارجہ نا رداٹ وزیرخارجہ سیکرٹری جنرل او آئی سی نا منصب ءِ سنبھالنگ آ حسین ابراہیم طہٰ ءِ مبارکبادی تس و پارے کہ ننے اومیت ءِ کہ او آئی سی نا راہشونی ٹی جہانی کہول آ پین فعال مریک۔ شاہ محمود قریشی پارے کہ او آئی سی نا بانی باسک انا وڑاٹ، پاکستان تنظیم نا قدر و مسخت آتا پاسداری کن سنبرینگوک ءِ۔ پاکستان او آئی سی ءِ امت نا اسٹ انگا و گچین توار نا وڑاٹ مون آ دننگ کن ہم سنبرینگوک ءِ۔ اوپارے کہ پاکستان 23-22مارچ 2022آ او آئی سی وزرائے خارجہ کونسل نا 48 می دیوان نا مہمانداری نا چداری ءِ۔ اسٹ آن پد ایلو اِرا وزرائے خارجہ کونسل نا دیوان تا مہمانداری مسلم امہ نا مسخت آتے مون آ دننگ کن پاکستان نا سنجیدگی نا شاہدی ءِ۔ پاکستان او آئی سی نا چندی باسک ملک آتون تین پہ تینی وڑاٹ سائنسی و اقتصادی کمکاری ءِ مون آ دننگ نا ارادہ تخک۔ داچرجوئی ٹی، آئی سی ٹی، طب، تعلیم، بھلو صنعتی و کشاری مشینری تا ہل و تس پاکستان نا خاص است خواہی نا بشخ ءُ۔ شاہ محمود قریشی پارے کہ گرج داہیت انا ءِ کہ او آئی سی، مسلم دنیا ءِ مون تروک چندی چیلنج خاص وڑاٹ اسلاموفوبیا ، امن و سلامتی و جھیڑہ غاتا ایسری نا چرجوئی ٹی اسہ گچین ءُ تنظیم اسے نا وڑاٹ تینا کڑد ءِ ادا کے۔ دامسخت آتا دوئی کننگ کن ننے تینا صف آتیٹی سیوت ءِ مون آ دروئی مریک۔ شاہ محمود قریشی اوغانستان نا حالیت آتا بابت پارے کہ اوغانستان اٹی 40 سال آن برجاجنگ ءِ چٹفنگ و اوغان تے مفاہمت و تعمیر نو نا قابل جوڑ کننگ نا اسہ موقع اس ساڑی ءِ۔ اوغانستان تون جہانی برادری نا سفارتی و سیاسی رابطہ اوغانستان اٹی دیرپاامن و سوگوی نا دوئی کننگ کن المی ءِ۔ جہانی برادری نا اومیت و اوغانستان اٹی ڈغاری راستکی تا نیام اٹ توازن قائم کننگ نا گرج ءِ۔ اوپارے کہ اوغانستان نازرگزران ءِ بھاز چیلنج آتا مون تروک ءِ۔ اوغانستان اٹ زرگزرانی بھسکاری نا اثر ہمسایہ ملک، ڈیہہ و ایلو دنیا غا مرتب مریک۔ وزیرخارجہ پارے کہ پاکستان اسہ ہمسایہ ملک اسے نا وڑاٹ اوغانستان ءِ انسانی امداد نا فراوانی کن کوشست آتے برجاتخانے۔ پاکستان اقوام متحدہ، و اوغانستان ءِ انسانی امداد فراوان کننگ نا خواہندار ایلو ادارہ غاتا کمک اٹ اوغانستان ءِ جہانی انسانی امداد نا فراوانی ٹی کمکاری کن تیار ءِ، نن سرپند مرینہ کہ انسانی بنداو تیا امداد نا فراوانی ءِ مشروط کننگ مناسب مفک۔ وزیرخارجہ پارے کہ اوغان زرگزران آ زور ءِ کم کننگ تون اوار اوار سسٹم نا بحالی کن میکانزم اس پٹنگ نا گرج ءِ۔ اوغانستان اٹی امن و سلامتی نا حالیت آتے قابو ٹی اتنگ، اول سرآن جھیڑہ غاتے توننگ و اوغان مہاجر آتا بھلو کچ اسے آ پیش تمنگ ءِ توننگ کن دمدستی گام گیج کروئی مریک۔ وزیرخارجہ سیکرٹری جنرل او آئی سی ءِ مقبوضہ جموں و کشمیر اٹی برجا انسانی حق انا بھارتی بھلا خلاف ورزی و ڈیہہ نا امن و ایمنی مون تروک خطرہ غاتیان معلومدار کرے و پارے کہ نن کشمیری تیکن او آئی سی نا پدریسہ مخ تفی نا ستاءِ کینہ، اوآئی سی نا قرارداد و بیان آتیان کودک کشمیری تا است بڈی مس۔ شاہ محمود قریشی پارے کہ 5 اگست 2019 نا تینا غیرکانودی و اسہ کنڈی گام گیج آن پد آن، بھارت مقبوضہ کمشیر اٹی آبادیاتی کچ ءِ غیر کانودی وڑاٹ بدل کننگ اٹ لگوک ءِ۔ ہندوستان نا کنڈآن مقبوضہ جموں و کشمیر اٹی نہہ لکھ کوزہ گیر فوج انا کمک اٹ ، انسانی حق انا بھلا و منظم خلاف ورزی پدریسہ برجاءِ۔
