اسلام آباد۔ 17 دسمبر (اے پی پی) وزیر داخلہ شیخ رشید احمد پارینے کہ وزیراعظم عمران خان او آئی سی کانفرنس آن خصوصی ءُ تران اس کیک ۔ جمعہ نادے آ میڈیا تون گپ وتران کرسا وزیرداخلہ پارے کہ او آئی سی دیوان کن بروک آ درملکی مندوبین آک ننا مہمان ءُ اوفتا خاص خیال ءِ تخنگک تانکہ اوفتا خذمت و اوفتا سیکورٹی ٹی ہچ ءُ کمتی اس مف۔ اوپارے کہ داکانفرنس اٹی 57 ملک آتا مندوبین و وزیرخارجہ غاک بشخ ہلنگ کن بننگ ءُ، او آئی سی کانفرنس داوخت آ اوغانستان نا حالیت، ہموڑے ودی مروک انسانی ویل و اوغانستان ءِ درکار امداد و چکار نا بابت تاریخی ءُ کڑد اس ادا کیک۔ اوپارے کہ او آئی سی کانفرنس نا سہرا ساڑی حکومت ءِ کاہک۔ 40 سال آن پد پاکستان اٹی او آئی سی کانفرنس نا اڈتننگ نا دا گام ءِ وزیراعظم عمران خان ہلکونے۔ اوپارے کہ داکانفرنس اٹی اسلام آباد اٹی ہفتہ و دوشنبے نادے آ ہندی وڑاٹ چھٹی مریک کانفرنس پارلیمنٹ اٹ مننگ ءِ ہنداخاطرآن داوخت آ ریڈزون اٹ ہِننگ وبننگ اٹ مشکل آتیا الس آن معذرت خواہ اُن۔ اوپارے کہ دا بھاز اہم ءُ کانفرنس اسے و دانا سیکورٹی نا گام گیج پاک فوج، سویلین ادارہ، ایجنسیز سی ڈی اے و اسلام آباد پولیس اواری اٹ کننگ ءُ۔
