لاہور۔ 17 دسمبر (اے پی پی) وزیراعظم نا سلاہکار احتساب شہزاد اکبر پارینے کہ شہبازشریف پڑک نا برخلاف میگا منی لانڈرنگ نا جاست وپاست اٹی چالان ایف آئی آر نمبر 39/2020ایف آئی اے پی ایس اینٹی کرپشن لاہور اسپیشل کورٹ سینٹرل اٹ جمع کرفنگانے۔ او جمعہ نادے آ داڑے 90 شاہراہ قائداعظم آ میڈیا تون گپ وتران کریکہ۔ شہزاد اکبر پارے کہ چالان اٹی شہباز شریف و حمزہ شہباز ءِ نئے بیرہ مرکزی دوبہ دار بلکن 16 ارب روپئی آن زیات نا منی لانڈرنگ نااصل فائدہ ہرفوک آتا وڑاٹ دوبہ دار گوندنگانے، 16 ارب روپئی آن زیات نا لانڈرنگ وڈی خوری غیرکانودی ذریعہ و ٹیکی تیان دوئی مروک زرآتیا تالان ءُ، چالان ءِ وڈی خوری نا توننگ نا ایکٹ 1947 و اینٹی منی لانڈرنگ ایکٹ 2010اٹی فوجداری ڈوہ تا رداٹ اسپیشل کورٹ سینٹرل لاہور اٹی ٹرائل نا بناکن جمع کرفنگانے۔ اوپارے کہ جاست وپاستی ٹیم مرکزی دوبہ دار آتا پارت آ لاہور و چنیوٹ نا چندی بینک آتیٹی شریف پڑک، شہباز شریف چپراسی و کلرک آتا پن تیا 2008 آن 2018 اسکان چلینگوک آ 28 اودیم بے پن بینک اکاؤنٹ آتا ڈس ءُ نشان ءِ خلک، خاہوت نا دا کھاتہ غاتیٹی 16 ارب روپئی آن زیات نا ڈیپازٹ دوئی مس، دادہ سال انا وخت اٹی شہباز شریف پدریسہ اِر ادور اسکان وزیراعلیٰ پنجاب نا عہدہ غا فائز ئس وخت اس کہ حمزہ شہباز شریف ایم این اے و شریف پڑک/رمضان شوگر ملز لمیٹڈ نا سی ای او ئس، جاست وپاستی ٹیم دا 28 اودیم بے پن بینک کھاتہ غاتیٹی 17 ہزار آن زیات کریڈٹ ڈیپازٹ ٹرانزیکشن نا کل زر 16304 ملین روپئی نا پورو منی ٹریلک نا تجزیہ ءِ کرے ، دا منی ٹریل پیدوار وڑاٹ ظاہرکیک کہ دا بے پن کھاتہ غاتیٹی ہمو بندغ و پارٹی نا کنڈآن ڈیپازٹ دوئی کننگا ہرافتا بورہ نا کاروبار تون ہچ ءُ تعلق اس الوکہ و نئے غلط ذریعہ وڈی خوری و سیاسی ٹکی پین پین آن مروک آ ناروا کٹیا ءِ ظاہر کیک۔ شہزاد اکبر پارے کہ درور نا وڑاٹ چپراسی گلزار احمد خان ایماندار نا پن آ اسہ بے پن اکاؤنٹ اسے ٹی 5 ملین روپئی دوئی مس ہرانا چیک گجرات نا اورنگزیب بٹ انا ئس۔ چالان نا ریکارڈ آن پک کرینن کہ دا نیزگار چپراسی گلزار احمد خان نا پن آ اسہ بے پن اکاؤنٹ 12000 روپئی تنخواہ ہراٹی جم وڑاٹ 1280 ملین لگ بھگ جمع مسوسس 2015 ٹی اونامرک اسکان آپریٹ کننگاسس۔ اوپارے کہ حکومت کریمنل جسٹس پیکج اس تیار کرینے ہرادے بروک آ جنوری ٹی پارلیمنٹ اٹ پیش کننگک۔
