اسلام آباد۔ 17 دسمبر (اے پی پی) بنجائی وزیر حوالکاری و شینکاری چوہدری فواد حسین پارینے کہ عمران خان اسٹ انگا لیڈر ءِ ہرانا مچ آ ملک اٹی وونٹ بینک ءِ، پاکستان تحریک انصاف آن بیدس اسہ سیاسی جماعت اس ہم 1100 نشست آتیا تینا گچین کاری اومیتدار بش کننگ کپک، پنجاب اٹی پی ٹی آئی و ن لیگ و سندھ اٹی پی ٹی آئی و پی پی پی نا نیام اٹ مقابلہ مریک، ایلو بیرہ مہمانک اداکار نا وڑاٹ بریرہ، اوفتا ہچ ءُ حیثیت اس اف۔ داخیال آتا درشانی ءِ او ’’سیاسی منظرنامہ‘‘ نا بابت ٹویٹر سپیس آ ٹویٹر صارف آتون گپ وتران کرسا کرے۔ بنجائی وزیر حوالکاری ٹویٹر صارف آتا سوج آتا ورندی ءِ تس، پروگرام نا بناٹی او تینا سیاسی زند انا بابت ہم معلومدار کرے۔ اسہ سوج اسے نا ورندی ٹی بنجائی وزیر حوالکاری پارے کہ پاناما کیس آن پد سیاست اٹ بھلو بدلی اس بس، نن ن لیگ ءِ بے نقاب کرین، ہراتم ہم نواز شریف یا مریم نواز نا کیس چلینگا تو اوکان مست آڈیو یا ویڈیو ٹیپ اس لیک مریک ہرانا مسخت عدالت آتیا زور شاغنگ مریک۔ مریم نواز نا کیس انا آخیریکو سماعت 17 می وار ملتوی مس، ہنداوڑ نواز شریف و زرداری نا کیس آتیٹی ہم فیصلہ مفننگ ءِ انتئے کہ دافک تینا کیس آتا فیصلہ ءِ مننگ کن اِلنگ پننگ ءُ، اسہ سوج اسے آ اوپارے کہ عمران خان پاکستان اٹ ٹوپارٹی سسٹم ءِ پرغا، ن لیگ و پی پی پی سی سال اسکان حکومت کریر، اوفتے اسہ کنڈ کننگ مشکل ئس، مریم نواز و نواز شریف سزایافتہ ءُ۔ اسہ پین سوج اسے آ او پارے کہ فیک نیوز آ بایدے ایکشن مرے ، دابابت بل اس تیار کرین، میڈیا نا برانز نا سوب آن دا بل پدتمنگ نا گواچی ءِ، کانود آن بیدس ویل آک ایسر مفسہ، فیک نیوز نا ویل بھلو حداسسکان ودانے۔ اوغانستان نا بابت سوج آ او پارے کہ ننا کوشست ءِ کہ اوغانستان اٹی حالیت آک گچین مریر، اگہ ہموڑے حالیت آک خراب مریرہ تو ننکن فریشانی نا سوب مریک، چل لکھ اوغان شاری مہالو آن داڑے کن ءُ، ننا زرگزران پین بھاریم ءِ سگنگ کپک۔ او آئی سی کانفرنس اٹ اوغانستان نا حالیت آتیا سجفنگک۔ اوورسیز پاکستانی تا وونٹ انا بابت سوج آ بنجائی وزیر حوالکاری پارے کہ اوورسیز پاکستانی تیکن نادرا اسہ ایپلی کیشن اس تیار کننگ ءِ ہرانا رداٹ اوورسیز پاکستانی تا وونٹ پک مریک، دا ایپلی کیشن نا کمک اٹ اسہ ویری فیکیشن ای میل اس صارف ءِ کننگک ہراٹی منہ سوج آتا ہرفنگک و پک کننگ نا عمل ءِ پورو کننگک، داڑآ کاریم برجاءِ، مسہ تُو اٹی دا کاریم پورو مریک۔ وزارت حوالکاری ٹی ڈیجیٹلائزیشن نا بابت سوج آ اوپارے کہ پی ٹی وی اسپورٹس ءِ ڈیجیٹل کننگ انگ ءِ، بروک آ پی ایس ایل سیریز آن مست پی ٹی وی سپورٹس ءِ ڈیجیٹل کننگک، قومی خبررساں نیوز ایجنسی ’’اے پی پی‘‘ ءِ رائٹرز و اے ایف پی نا وڑآ ڈیجیٹل نیوز ایجنسی اس جوڑ کرین، ’’پی ٹی وی فلم‘‘ انابناءِ کننگ ءِ، داکان بیدس ریفارمز انا اسہ بھلو فہرست اسے ہرادے وزارت حوالکاری ٹی اتنگ انگ ءِ۔ ٹویٹر صارف عمران راجہ نا سوج انا ورندی ٹی بنجائی وزیر حوالکاری پارے کہ میڈیا نا گڑاس پڑک خواپسہ کہ میڈیا ریگولیشنز مرے، میڈیا پڑک آتے لندن اٹ جرمانہ مرے تو اوفتے ادا کیرہ ولے نن جرمانہ و ریگولیشنز اتین تو میڈیا نا دا پڑک برانز نا بناءِ کیک۔ اوپارے کہ ریگولیشنز آن بیدس ملک مون آ ہِننگ کپک۔ سوشل میڈیا پلیٹ فارم نا دفترآتا بابت آن سوج آ بنجائی وزیر حوالکاری پارے کہ فیس بک نا دفتر پاکستان اٹ ملنگ نا بابت ہیت مس تو داڑے اونا برخلاف مقدمہ درج کننگا، ہراتم داوڑ مقدمہ غاک درج مریرہ تو دانگیا مخلوق بننگ آن خُلیک۔ پاکستان اٹ فیس بک، ٹویٹر، یوٹیوب تون اوار ایلو سوشل میڈیا پلیٹ فارم آتیکن بھلو بزنس اسے ولے داڑآ ہچ ءُ چیک اس اف۔ اوپارے کہ 2018ء ٹی ایف بی آر ءِ چٹھی اس نوشتہ کریسن کہ ڈیجیٹل ایڈورٹائزنگ بھاز ترندی اٹ ودنگ ءِ۔ اوپارے کہ نیویارک ٹائمز ءِ اسلام آباد آ پدی بٹنگان، اے پی نا دفتر داڑے ساڑی ءِ، ڈی ڈبلیو تینا دفتر ءِ دُوارہ ملنگ آ رضامندی ظاہر کرینے۔
