کوئٹہ۔ 17 دسمبر (اے پی پی) بلوچستان اٹی جعلی انویسٹمنٹ کمپنی فراڈ کیس، احتساب عدالت دوبہ دار معظم جان ءِ 10 سال بندی 5 کروڑ روپئی جرمانہ کننگ نا سزا بنفے ۔ ترجمان نیب بلوچستان نا رداٹ این اے او نا سیکشن A-31اٹی دوبہ دار ءِ 3 سال نا پین سزا ہم بنفنگا۔ دوبہ دار سد آ مخلوق ءِ کٹیا نا جھانسہ ترسا اوفتے کروڑ آ روپئی آن محروم کرے۔ احتساب عدالت کوئٹہ جعلی انویسٹمنٹ کمپنی فراڈ کیس اٹ دوبہ دار پک مننگ دوبہ دار معظم جان ءِ 10 سال بندی و 5 کروڑ روپئی جرمانہ نا سزا بنفینے۔ این اے او نا سیکشن A-31اٹی دوبہ دار 3 سال پین زندان اٹ تینا قید ءِ پورو کیک۔ کیس انا فیصلہ احتساب عدالت نمبر 3 نا جج آفتاب لون بنفے، نیب انا کنڈآن پراسیکیوٹر محمد داؤد جان کیس انا پیروی ءِ کرے۔ نیب بلوچستان نا جاست وپاست نا رداٹ دوبہ دار معظم جان جعلی انوسٹمنٹ کمپنی نا کمک اٹ اسٹاک ایکسچینج اٹ کٹیا نا جھانسہ ترسا سد آ سادہ انگا بندغ آتیان کروڑ آ روپئی تے ہلک و منہ وخت منافع نا زرس زرتسا روپوش مس۔ نیب بلوچستان دوبہ دار نا برخلاف غاوتیا دمدستی کارروائی کرسا جاست وپاست ءِ پورو کرسا کیس ءِ احتساب عدالت اٹ دائر کرے، ولے دوبہ دار نروک ئس ہرادے منہ وخت مست نیب انا انٹیلی جنس ٹیم کراچی آن دزگیر کرسا زندان آ گدریفیسس۔ احتساب عدالت کوئٹہ جمعہ نا دے آ دوبہ دار نا برخلاف ناقابل تردید شاہدی تے مون آ تخسا سزا و جرمانہ نا پرمان جاری کرینے۔
