اسلام آباد۔16دسمبر (اے پی پی):اسلامی کمکی گل (او آئی سی) ءِ اسٹنٹ سیکرٹری جنرل برائے بنی آدمی یکوئی، دود ءُ ربیدگ ءُ ھاندانی کار طارق علی بخیت ءَ او آئی سی ءِ نیم گءَ سکیں ساھت ءَ اوگان الس آنی گیشاں چہ گیش کمک کنگ ءِ جزم ءَ درشان کنان ءَ گوشتگ کہ پاکستان ءِ میزبانی ءَ اسلامی ملک وزیر ءِ درئی کار ءِ لس کانفرنس اوگانستان ءَ بنی آدمی ڈکال ءَ گوں گر ءُ چیل بوھگ ءَ کلیتی کرد ءِ دار ایت، اے رد ءَ او آئی سی وزیر ءِ درئی کار ءِ لس دیوان ءَ باز ارزشتی ءُ ٹوھیں منوگری منظور کنائینگ بیت۔
آئی ءَ اے ھیالانی درشانی پنچ شمبے ءِ روچ ءَ میڈیا ءَ گوں تران کنان ءَ کت۔ آئی ءَ گوشت کہ آ اسلامی کمکی گل ءِ نیمگ ءَ اوگانستان ءِ استیں جاور ھال آنی سر ءَ سعودی عرب ءِ او آئی سی وزیر ءِ درئی کار کانفرنس ءَ را گوانک جنگ ءِ گامگیج ءَ را وش اتک کناں۔
آئی ءَ پاکستان ءِ نیمگ ءَ اے کانفرنس ءِ میزبانی ءُ جوانیں انتظامی بست ءُ بند کنگ ءَ را ساڑاھان ءَ پاکستان ءِ حکومت ءُ الس ءِ شگر ءُ منت گپت۔ آئی ءَ امیت سہرا کت کہ اے کانفرنس وتی مول ءُ مراد آنی در جنگ ءَ کامیات بیت۔
آئی ءَ گوشت کہ اے کانفرنس ءِ بازیں مول ءُ مراد است کہ چتور او آئی سی اوگانستان ءِ استیں جاور ھال ءُ بنی آدمی ڈکال ءَ گوں گر ءُ چیل ءِ واستہ کلیتی کرد پیلو کت کنت ءُ چتور او آئی سی اوگانستان ءَ بنی آدمی ڈکال ءِ گوما یکوئی ءُ کمک ءِ واستہ ٹوھیں گامگیج کت کنت، اے کانفرنس ءِ بنیاتی مول ءُ مراد انت ءُ اے کانفرنس اے رد ءَ بازیں ارزشت ءُ ٹوھیں منوگری منظور کنت انت۔
آئی ءَ گوشت کہ اے کانفرنس ءَ اے بنی آدمی ڈکال ءِ گیواری ءِ واستہ ٹوھیں ءُ مھکمیں گامگیج ءِ سر ءَ چار ءُ تپاسی کنگ بیت۔ آئی ءَ گوشت کہ او آئی سی ایشی ءَ چہ پیسر گوست ءَ ھم وزارتی ءُ سروکی تک ءَ اوگان ءِ جاور ھال آنی بابت ءَ بازیں منوگری منظور کتگ ءُ نوں اوگانستان ءَ بنی آدمی جاور ھال آنی ھوالگ ءَ ٹوھیں گامگیج ءُ کار رپک سہرا کنگ ءِ واستہ اے کانفرنس گوانک جنگ بوتگ۔
اے کانفرنس ءَ باسکیں ملک آنی وزیر ءِ درئی کار ءِ گیشاں چہ گیش بھر زوری ایشی ءِ سہرائیں درور انت کہ او آئی سی اوگانستان ءِ اے نازرکیں جاور ھال آنی بابت ءَ باز پکو ءُ جزمیگ انت۔ یک جُستے ءِ پسو ءَ آئی ءَ گوشت کہ اے کانفرنس اوگان الس ءِ مشکل آنی کم کنگ ءَ کمکار سہرا بیت ءُ او آئی سی اے رد ءَ توامیں ادارگ آناں تیار کنگ ءِ واستہ کوشست کنت انت۔
