سکردو۔ 16 دسمبر (اے پی پی) وزیراعظم عمران خان پارینے کہ ملک انا پسماندہ و گوجالنگوک آ علاقہ غاتا شونداری ساڑی حکومت نا اولیت ءِ، سکردو انٹرنیشنل ایئرپورٹ و گچین سڑک آتا تفنگ آن ہندی وجہانی سیل و سواتی تے آسراتی ملنگ آن گلگت بلتستان اٹ سیل و سوات ءِ پین مون آ دننگک و علاقہ ٹی اقتصادی شونہالی بریک، پاکستان نا گیشتر و دلکش ہند آتا حامل سیل و سوات پاکستان نا میرات جوڑ مننگ کیک، سیل وسوات نا بشخ اٹی گلگت بلتستان آن سالانہ 30 آن 40 ارب ڈالر دوئی کننگ مریک و ہندی مخلوق ءِ روزگار نا بھلو وارخواہی اس ہم دُوبریک۔ پنچ شنبے نادے آ داڑے اسکردو انٹرنیشنل ایئرپورٹ و سٹریٹجک جگلوٹ سکردو روڈ انا بنانا وخت آ السی مچی آن تران کرسا وزیراعظم پارے کہ اسہ ملک اس ہم ہمووخت اسکان شون ہلنگ کپک ہراتم اسکان پدی سلوک آ علاقہ غاتے بڑزا ہرفنگپک۔ ہراتم اقتدار ءِ سنبھالان تو ہمووخت آ ننا کوشست ئس کہ گلگت بلتستان، بلوچستان ، مسکوہی فاٹا، سندھ اٹی و سویلی پنجاب تون اوار مر مر انگا پسماندہ علاقہ غاتے ایلو شون ہلوک علاقہ غاتا بریبر اتین۔ داڑے نیزگاری نا شیفکو لکیر آن مخلوق ءِ کشن انتئے کہ ہرا راج اٹ نیزگار نیزگار و ہزگار ہزگار مرے دا زرگزرانی نا انصافی اسے۔ راج اسے ٹی شونہالی نا کساس ءِ ہموڑے ہزگار مخلوق نا زند ءِ ہرسا آخا بلکن نیزگار آتا رہینگ انگ ءِ مون آ تخسا خلنگک۔ وزیراعظم پارے کہ ملک آن نیزگاری نا کمتی کن پورو وڑاٹ کوشست کننگ اُن۔ خیبرپختونخوا ٹی ہراتم 2013ٹی ننا حکومت بس تو اووخت ہموڑے غٹ آن زیات دہشت گردی آن بھسکاری مسوسس۔ مخلوق نا رکھ انا زموار پولیس نا تینٹ تینا 700 کارندہ شہید مسر۔ یواین ڈی پی تینا رپورٹ اٹی پارے کہ 2013آن 2018 اسکان ننا حکومت اٹی خیبرپختونخواٹی ترندی اٹ نیزگاری کم مس۔ ننا کوشست ءِ کہ ننا حکومت نا پنچ سال پورو مریر تو پدی سلوک آ علاقہ غاک شونداری و شونہالی ٹی بڑزا بریر۔ وزیراعظم پارے کہ اودے خوشی ءِ کہ سکردو ٹی انٹرنیشنل ایئرپورٹ جوڑ مسنے۔ وخت پک کیک کہ سکردو نا ایئر پورٹ نا انٹرنیشنل جوڑ مننگ آن داجاگہ نا مخلوق نا زند اٹی نمان بدلی اس بریک۔ اوپارے کہ ای مچ آ دنیا نا حسین ہندآتے خنانٹ و باوری اٹ پاننگ کیوہ کہ دنیا نا غٹ آن زیباانگا مشی آ چرجوئی گلگت بلتستان اٹی ءِ ۔ مہالو دا علاقہ غاتیا بننگ مشکل ئس، پیشن نا ملک آن بروک آ سیل وسواتیک اول کراچی یا اسلام آباد آ بسرہ۔ ہراڑے موسم نا خرابی نا سوب آن جہاز آک کیہی کیہی دے ہرے نا گواچی مسرہ ولے داسہ پیشن نا ملک آن براہ راست جہاز آتیان بھلو کچ اسے ٹی سیل و سواتیک دانگیا بننگ کیرہ۔ اوپارے کہ سڑک آتا گچین مننگ آن ملک انا تہہ ٹی باسن انگا علاقہ غاتا مخلوق ہم دانگیا بریرہ۔ وزیراعظم پارے کہ 30 سال مست سکردو جگلوٹ روڈ آ سفر کریٹ ہموتم دا سڑک بھاز خطرناک ئس۔ وزیراعظم این ایچ اے و ایف ڈبلیو او ءِ مشکل و خطرناک روڈ اس جوڑ کننگ آ خراج تحسین پیش کرے ہراڑآن سکردو آن گلگت نا سفر 8 گھنٹہ غان کم مرسا 3 گھنٹہ سلک۔ وزیراعظم کاریم اٹی شہید مروک آ ایف ڈبلیو او نا فوجی ورناتے ہم خراج عقیدت پیش کرے۔ وزیراعظم پارے کہ سیل و سوات پاکستان نا میرات جوڑ مننگ کیک۔ گلگت بلتستان نا مقابلہ ٹی سویٹزر لینڈ نا رقبہ نیمہ ءِ ولے او سیل و سوات آن سالانہ 70 ارب ڈالر کٹک وخت اس کہ پاکستان نا سالانہ کل برآمد 30 ارب ڈالر اسکان ءُ۔ وزیراعظم پارے کہ او چندی مخلوق تون ملانے ہرا سویٹزر لینڈ و آسٹریلیا غان دانگیا بسر او تینٹ پارہ کہ سویٹزر لینڈ و آسٹریا داعلاقہ غاتا بریبر افس۔ داڑے ہڑتوم آ موسم آتیٹی سیل و سوات نا وارخواہی ساڑی ءِ۔ وزیراعظم پارے کہ داکان آزاد کشمیر ءِ ملفوک آ روڈ آن فاصلہ پین کم مریک۔ آسانی مریک تو سیل وسوات ءِ مون آ دننگک۔ اووزیراعلیٰ گلگت بلتستان ءِ پارت کرے کہ او علاقہ غاتا ڈغار نا پورو وڑاٹ خیال ءِ تخے، پیشن آن مخلوق دانگیا برسا کبین بہاڈغار ہلیرہ۔ داڑے مہالو آن ڈغار کم ءِ۔ داڑے ریزارٹ جوڑ کروئی ءِ اوفتے کن ڈغار تخر انتئے کہ اگہ نن سوچ سمجھ آن کاریم ہلین تو بیرہ گلگت بلتستان آن 30 آن 40 ارب ڈالر سیل و سوات آن دوئی کننگ کینہ۔ وزیراعظم پارے کہ پاکستان اٹ مذہبی سیل و سوات نا ہم بھلو وارخواہی اسے۔ گندھارا تہذیب نا آثار، کٹاس راج تون اوار بخال آتیکن سیل و سواتی ہند ساڑی ءِ۔ صوفی ازم اکن بھلو بھلو درگاہ ساڑی ءِ۔ وزیراعظم پارے کہ داکان بیدس پاکستان تون بھلو سمندری دنگ ساڑی ءِ۔ ہموڑے ریزارٹ جوڑ مننگ کیک۔ اللہ دا ملک ءِ ہرا ہرا نعمت آتے تسنے اوفتیان داسکان فائدہ ہرفنگتنے۔ وزیراعظم پارے کہ ہندی وجہانی کہول آ دا علاقہ ٹی سیل و سوات نا مون آ دننگ آن ہندی مخلوق ءِ فائدہ دوئی مریک۔ مخلوق ءِ روزگار کن پیشن ہنوئی تمپک بلکن پیشن آن مخلوق روزگار نا پٹنگ اٹ دانگیا بریک۔ وزیراعظم پارے ک داڑے بجلی نا بھاز بھلو ویل اسے ہراڑکن وزیراعلیٰ ہائیڈرو الیکٹرک ڈٹ اسے نا پڑو کرینے۔ اووزیراعلیٰ ءِ پارے کہ او مرمرانگا علاقہ غاتا مخلوق نا آسراتی کن پین ضلع غاتا سلاہ ایتے۔ وزیراعظم پارے کہ داوخت آ مچ آ دنیا ءِ کبینی مون تروک ءِ۔ کورونا لاک ڈاؤن نا سوب آن سپلائی لائن سلنگا، واپار بند مسوسس۔ اوپارے کہ حکومت نیزگار تپہ غاتا مشکل آتے مون آ تخسا نت، سی و دال آتیا 50 ہزار آن کم کٹیا نا حامل بندغ آتے 30 درسد رعایت تننگ کن احساس راشن کارڈ انا ڈٹ اس ایسونے۔ داکان بیدس ہر شاری ءِ ہیلتھ انشورنس کن جان جوڑی کارڈ تننگ اُن۔ ہزگار ملک آتیٹی ہم ہر شاری ءِ دا آسراتی دوئی اف۔ گلگت بلتستان، آزاد کشمیر و خیبرپختونخوا ٹی ہر اُراءِ دا آسراتی دوئی ءِ۔ داکان مست وزیراعلیٰ گلگت بلتستان خالد خورشید ہم جلسہ غان تران کرے۔
