اسلام آباد۔ 16 دسمبر (اے پی پی) وزیراعظم عمران خان آرمی پبلک اسکول پشاور نا شہید آتے خراج عقیدت پیش کرسا پارینے کہ ببو اواری اٹ قول کین کہ مچ آ قوم یکجا مرسا فرقہ وارانہ، مذہبی و نسلی تعصب تالان کروک، تفرقہ تالان کروک و تینا ناپاک سیاسی عزم ءِ پورو کننگ کن داوڑنا چم بازی کروک آتا برخلاف ہنداوڑ سلنہ و تینا صف آتیٹی ساڑی ہمو زموار آتا پیدواری ءِ کرسا اوفتا توننگ اٹ ریاست تون تفنہ، ای اینو مچ آ قوم ءِ دا باور کرفیوہ کہ دشمن پاکستانی قوم انا حوصلہ غاتے اسُل شیف شاغنگ کپک۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم عمران خان سانحہ آرمی پبلک اسکول پشاور ءِ ہفت سال پورو مننگ نا وخت آ تینا کلہو اٹی پارے کہ اینو نادے مچ آ پاکستانی قوم ءِ دا است ہسون سانحہ نا یات ترفک ہرا تم لغور شرپسند زموار آک ننا قوم انا آخبت، کودک کم سن چناتیا جلہو کرسا اوفتے شہید کریر۔ اینو نادے آرمی پبلک اسکول نا ہمو نرزور استاد آتا یات ترفک ہرا تینا طالب علم آتا رکھ اکن دشمن نا مون آ سوگو ءُ دیوال اسے آنبار سلسا تینا جان تا نذرانہ پیش کریر۔ وخت پک کرے کہ بے شک دہشت گردی نا ہچ ءُ مذہب یا قوم اس مفک، اونا پد اٹ ہمو لغوری نا سوچ مریک ہرا تیناناپاک سیاسی عزم ءِ پورو کننگ کن کودک کم سن چناتے ہم کاریم اٹ اتنگ کیک۔ آرمی پبلک اسکول نا شہید آتا قربانیک زیان مفسہ۔ داسانحہ غان پد نرزور پاکستانی قوم نا حوصلہ شیف مننگ نا جاگہ غا دہشت گردی نا برخلاف پین بڑز مس۔ مچ آ قوم یکجا مس و نن نیشنل ایکشن پلان نا رداٹ دشمن تے اوفتا ٹھکانہ غاتیٹی پٹسا پٹسا شست کرین۔ وزیراعظم پارے کہ ای اینو مچ آ قوم ءِ دا باور کرفیوہ کہ دشمن پاکستانی قوم انا حوصلہ غاتے اسُل شیف شاغنگ کپک۔ پاکستانی قوم انا عزم ، حوصلہ و ہمت ءِ شرپسند زموار آک ہراتم بدل کننگ نا کوشست کریر، اوفتے بوز اٹ کنوئی تما۔ اینو نادے ببو اواری اٹ قول کین کہ مچ آ قوم یکجا مرسا فرقہ ورانہ ، مذہبی و نسلی تعصب تالان کروک، تفرقہ تالان کروک و تینا ناپاک سیاسی عزم ءِ پورو کننگ کن داوڑنا چم بازی کروک آتا برخلاف ہنداوڑ سلنہ و تینا صف آتیٹی ساڑی ہمو زموار آتا پیدواری ءِ کرسا اوفتے توننگ اٹ ریاست تون تفنہ۔ وزیراعظم آرمی پبلک اسکول نا شہید آتا درجہ غاتا بڑزی و اوفتا خاہوت ءِ صبر و جمیل نا دعا کرے۔ وزیراعظم پارے کہ قائد اعظم نا فرمان ءِ کہ دنیا ٹی ہچ ءُ دُن ءُ طاقت اس اف ہراپاکستان ءِ نسخان تننگ کے۔
