اسلام آباد۔ 16 دسمبر (اے پی پی) صدر مملکت ڈاکٹر عارف علوی خلائی پٹ وپول و انفارمیشن ٹیکنالوجی نا بشخ اٹی شونداری نا رفتار ءِ ودفنگ نا گرج آ زور شاغسا پارینے کہ دنیا ٹی ٹیکنالوجی ترندی اٹ شون ہلنگ ءِ، شونداری نا سفر اٹ مون آ ہِننگ کن زوت فیصلہ کروئی مریک۔ صدر مملکت پنچ شنبے نادے آ داڑے انسٹیٹیوٹ آف سپیس ٹیکنالوجی ٹی ایروسپیس سائنس و انجینئرنگ نا بارواٹ 7 می جہانی کانفرنس آن تران کریکہ۔ دود اٹی چیئرمین سپارکو میجر جنرل (ر) عامر ندیم، وائس چانسلر انسٹی ٹیوٹ آف سپیس ٹیکنالوجی میجر جنرل (ر) ریحان عبدالباقی، کانفرنس نا سیکرٹری ڈاکٹر نجم عباس نقوی، سائنسدان آتون اوار ملکی و درملکی مندوبینک ہم بشخ ہلکر۔ صدر مملکت پارے کہ سپارکو نا کمک اٹ خلاغان بھاز انگا معلومداری فراوان مریک، مواصلاتی سیارہ غاتا کمک اٹ انسان ءِ لاتعداد معلومدار و ڈیٹا ملک، معلومداری ٹی ودکی کننگ کن داتم اسکان 24 ہزار آن زیات سیٹلائٹ لانچ کننگانے۔ ڈاکٹر عارف علوی پارے کہ چنکی ٹی کہکشاں تے ہرسا خوش مسنہ، پاکستان اٹی آئی ٹی نا بشخ اٹی لکھ آ مخلوق نا گرج ءِ ، انفارمیشن ٹیکنالوجی نا چاہندار آتا ننا افرادی قوت نا خواست یورپ و دیکی اسکان مننگ کیک ولے پاکستان آئی ٹی نا بشخ اٹی چاہندار آتے ملک انا شونداری کن کاریم اٹ اتیک۔ اوپارے کہ دنیا ٹی جعلی خبر بھلو کچ اسے آ چلینگ انگ ءِ، انفارمیشن ٹیکنالوجی نا کمک اٹ شفافیت ءِ مون آ دننگ و دروغ انا مون ءِ توننگ مریک۔ صدر پارے کہ پوسکن آ ٹیکنالوجی ءِ اختیار کننگ اٹ انسان ہچکچاہٹ محسوس کیک، پوسکن آ دور اٹ پترینگ انگ کن لیڈرشپ انا گرج تمک۔ اوپارے کہ پوسکن آ دنیا ٹی ٹیکنالوجی ءِ زوت امنا کننگ نا گرج ءِ، حکومت خلائی پٹ وپول و آئی ٹی نا بشخ اٹ شونداری کن تینا ہرممکن کڑد ءِ ادا کیک۔ صدر مملکت پارے کہ دنیا تون داخہ در ڈیٹاارے کہ اوفتا جاچ ءِ ہلنگ ہم مشکل ءِ۔ اوپارے کہ ٹیکنالوجی ٹی جدت بننگ ءِ، ٹیکنالوجی نا شونداری کن آخبت نا گرج آتے ہم مون آ تخوئی مریک۔ صدر مملکت پارے کہ ملک اٹ آئی ٹی نا گریجوایٹس آتا کچ بایدے ودے و حکومت دا عمل نا است بڈی ءِ کیک۔ داکان مست انسٹی ٹیوٹ آف سپیس ٹیکنالوجی (آئی ایس ٹی) نا وائس چانسلر میجر جنرل (ر) ریحان عبدالباقی کانفرنس اٹ بشخ ہلنگ آ صدر مملکت نا منت واری ءِ ہرفے۔ اوکانفرنس اٹ بشخ ہلوک آتے ادارہ نا گرج و مسخت و اونا سرسہبی تا بارواٹ معلومدار کرے۔ اوپارے کہ ادارہ خلائی پٹ وپول نا پروگرام تون اوار سائنس و ٹیکنالوجی نا بشخ انا مون آ دننگ کن پبی کڑد ادا کننگ ءِ۔ صدر مملکت کانفرنس نا وخت آ انسٹی ٹیوٹ آف سپیس ٹیکنالوجی نا چاہندار آتا کنڈآن خلوک آ اسٹال آتا ہم معائنہ ءِ کرے۔
