اسلام آباد۔ 16 دسمبر (اے پی پی) چیئرمین سینیٹ محمد صادق سنجرانی سانحہ آرمی پبلک اسکول، اے پی ایس پشاور نا شہید آتے خراج عقیدت پیش کرسا پارینے کہ داسانحہ ءِ یات کرسا قوم انا غم اینو ہم تازہ ءِ، پاکستانی قوم اے پی ایس نا شہید و اوفتا خاہوت آتا قربانی تے مدام یات تخک۔ پنچ شنبے نادے آ سانحہ اے پی ایس نا ہفت می برسی نا وخت آ تینا کلہو اٹی اوپارے کہ است ہسون انگا سانحہ آرمی پبلک اسکول ءِ 7 سال گدرینگا ولے اودے یات کرسا قوم انا غم اینو ہم تازہ ءِ، دا است ہسون سانحہ اینو ہم ننا ذہن تیٹی دروآنبار تازہ ءِ۔ چیئرمین سینیٹ پارے کہ شہید چناتا عظیم قربانیک قوم ءِ پوسکن ءُ حوصلہ و عزم اس تسنو، سلہہ بند فوج و سول سیکورٹی ادارہ غاک دا سانحہ ٹی اوار دہشت گرد آتیا کاری ضرب اس خلسا اوفتے اوفتا کروک آ سزا تسنو۔ اوپارے کہ پاکستانی قوم اے پی ایس نا شہید و اوفتا خاہوت آتا قربانی تے قیامت اسکان یات تخک۔ اوپارے کہ مچ آ قوم و حکومت شہید آتا لمہ وباوہ غاتون سلوک ءِ، کودک شہید آتا بے مٹ آ قربانیک زیان مفسہ۔
