کوئٹہ۔ 16 دسمبر (اے پی پی) اسپیکر بلوچستان اسمبلی میر جان محمد خان جمالی پارینے کہ دہشت گردی نا چٹفنگ کن قوم سیکورٹی فورس آتون ہم کوپہ سلوک ءِ۔ 16 دسمبر مدام ملک انا تاریخ نا اسہ تہار ءُ دے اسے نا وڑاٹ یات تخنگک ہراتم لغور دہشت گرد آک تینا ناپاک عزم انا پورو کننگ کن پھل انگا کودک چناتے تینا بربریت نا شست کریر۔ داخیال آتا درشانی ءِ او سانحہ آرمی پبلک اسکول پشاور نا شہید آتا ہفت می برسی نا وخت آ تینا اسہ کلہو اسے ٹی پارے ۔ اوپارے کہ سانحہ آرمی پبلک اسکول پشاور قوم ءِ دہشت گردی نا برخلاف یکجا کرے و شہید آتا قربانی تا سوب آن امن مسنے۔ اوپارے کہ امن کن قوم عظیم قربانی تسنے ہرانا سوب آن اینو نن پرامن ءُ چاگڑد اسے ٹی رہینگ انگ اُن۔ اے پی ایس نا کودک شہید و اوفتا خاہوت آتے سلام پیش کرسا اسپیکر بلوچستان اسمبلی میر جان محمد خان جمالی پارے کہ اے پی ایس نا شہید آتا غم اینو ہم ننا است آتیٹی زندہ ءِ، اوداعزم انا درشانی ءِ کرے کہ نن تینا سیکورٹی ادارہ غاتا کمک اٹ دہشت گردی نا عفریت ءِ پورو چٹفنہ، پاکستانی قوم اسہ نرزور و دلیر ءُ قوم اسے ہرافتا حوصلہ داوڑنا لغوری نا کارروائی تیان اسُل شیف شاغنگ مفک اینو نادے ننے دا پنت ایتک کہ قومی سیوت و سخااٹ نن تخریب کار زموار و ملک دشمن کارروائی تیٹی اوار بندغ آتا بیخ ءِ کشنگ کن اجتماعی وڑاٹ بحیثیت قوم تینا کڑد ءِ پورو کینہ۔ اسپیکر اے پی ایس نا شہید آتا لمہ و باوہ غاتا ہمت و حوصلہ ءِ خراج تحسین پیش کرسا شہید آتا درجہ غاتا بڑزی کن دعا کرینے۔
