کوئٹہ۔ 16 دسمبر (اے پی پی) پی ٹی آئی نا راہشون صوبائی وزیر سائنس اینڈ انفارمیشن ٹیکنالوجی مبین خان خلجی پارینے کہ سانحہ آرمی پبلک اسکول ملکی تاریخ نا تہار ءُ دے اسے دا سانحہ نا وخت اینو ہم مچ آ قوم انا ذہن تیٹی ءِ ، دا است ہسون واقعہ ٹی اسکول نا پرنسپل ، استاد، طالب علم و ایلو عملہ تون اوار 140 آن زیات کودک بندغ آک شہیدی نا جام ءِ نوش کریر۔ دہشت گردی نا دا است ہسون واقعہ غا اینو ہم قوم غمزدہ ءِ، و دا کودک شہید ہیروک ننا گمر ءُ۔ داخیال آتا درشانی ءِ او سانحہ آرمی پبلک اسکول پشاور نا شہید آتا ہفت می برسی نا وخت آ تینا کلہو اٹی پارے کہ اینو نادے شہید آتا عظیم قربانی تا یات ءِ تازہ کرفسا کیک، قوم اے پی ایس نا چنا و استاد آتا بے مٹ قربانی تے مدام یات تخک۔ دا است ہسون سانحہ مچ آ قوم ءِ سرفے و و مچ آ قوم ءِ دہشت گردی نا برخلاف یکجا کرے۔ صوبائی وزیر پارے کہ اے پی ایس نا کودک چناک تینا دتر اٹ رکھ و پرامن پاکستان نا تاریخ ءِ نوشتہ کریر، عظیم قربانی تا طفیل قوم انا بے مٹ سیوت و سخامون آ بس، شہید چناتا عظیم قربانیک قوم ءِ پوسکن ءُ حوصلہ و عزم اس تسر، ہرانا سوب آن سفاک دشمن ءِ شکست مس و پاکستان امن نا وت جوڑ مس، اینو نادے شہید چنا، استادآتے خراج عقیدت و اوفتا خاہوت آتے سلام پیش کینہ۔ صوبائی وزیر پارے کہ مچ آ قوم، سیاسی سرکڑدہ و سیکورٹی فورس آک دہشت گردی نا چٹفنگ کن اسہ پنہ غاٹو۔
