اسلام آباد۔ 16 دسمبر (اے پی پی) بنجائی وزیر حوالکاری و شینکاری چوہدری فواد حسین و وزیر مملکت حوالکاری فرخ حبیب تون کونسل آف پاکستان نیوز پیپر ایڈیٹرز(سی پی این ای) نا ڈل اوڑدہی کرے و حکومت نا ڈیجیٹل میڈیا پالیسی نا ستاءِ کرسا خواست کرے کہ سی پی این ای نا ساڑی آ باسک پبلی کیشنز ڈیجیٹل میڈیا پالیسی نا رداٹ بائی ڈیفالٹ رجسٹرڈ مرے۔ ڈل انا باسک آتون گپ وتران کرسا بنجائی وزیر حوالکاری چوہدری فواد حسین پارے کہ سی پی این ای نا باسک پبلی کیشنز پوسکن آ ڈیجیٹل پالیسی نا رداٹ بائی ڈیفالٹ رجسٹرڈ مریک، میڈیا نا ادارہ اس ٹرانسفارمیشن نا کنڈآ کائے تو اونا پبی کمک ءِ کننگک۔ اوپارے کہ وزارت حوالکاری نا آفیسر و میڈیا ادارہ غاتا نیام اٹ رابطہ غاتے مون آ دینہ۔ چوہدری فواد حسین پارے کہ صحافی تا حق انا رکھ اکن سی پی این ای نا کڑد ناقابل فراموش ءِ۔ اوپارے کہ ریجنل پریس سوگو مننگ نا فائدہ پاکستان ءِ مریک، علاقائی اخبار تے سوگو کننگ اٹ پبی کمک کینہ۔ اوپارے کہ 18 می آئینی ترمیم آن پد علاقائی اخبار آک صوبائی سبجیکٹ ءُ، بنجاغان پیسہ صوبہ غاتے گدریفنگک، ریجنل اخبار تے ہرا آسراتی ملے او ملپننگ ءِ۔ اوپارے کہ اخبار آتے ڈیجیٹل کننگ کن 10 لکھ روپئی اسکان وام انا آسراتی ایتنہ ، وزارت انفارمیشن ٹیکنالوجی اخبار تا ڈیجیٹلائزیشن اٹ کمک کیک۔ بنجائی وزیر حوالکاری پارے کہ خبرتا تالان کننگ نا ٹیکنالوجی ودنگ تون اوار اوار علاقائی میڈیا نا اہمیت اٹی ہم ودکی مسنے، علاقائی میڈیا ہندی ویل آتے تالان کننگ اٹ اہم ءُ کڑد اس ادا کیک۔ بنجائی وزیر حوالکاری پارے کہ 2018ء ٹی ہراتم او اولیکو وار وزیر حوالکاری مس تو او وخت آ اشتہار آتے ڈیجیٹلائز کننگ نا کاریم نا بناءِ کرے۔ اشتہار آتا نظام اٹ شفافیت ءِ پک کرے۔ پریس انفارمیشن ڈیپارٹمنٹ ءِ پیپرلیس کننگ نا کاریم نا بناءِ کرینن، زوت پی آئی ڈی ءِ پیپر لیس کننگک۔ اوپارے کہ داوخت آ اشتہار آتا پورو نظام پیپرلیس ءِ، غٹ اشتہار تے ڈیجیٹلائز کرینن، ریلیز آرڈر اٹ ہرے کون آ ویل آتے ہم ایسر کننگانے، پی آئی ڈی ءِ اے جی پی آر تون براہ راست منسلک کننگ آن زرتس اٹی پین آسانی ودی مریک۔ بنجائی وزیر حوالکاری پارے کہ اپریل 2020ء آن پد آن اشتہار آتا مد اٹ زرتس ہرے نا گواچی متو ، 2018ء آن پد آن غٹ زرآتے تننگانے، کلائنٹ آتا زرتس انا بابت گڑاس ویل ارے، اوفتیا تینا کلائنٹ آتون ہیت کینہ۔ اوپارے کہ پاکستان تحریک انصاف نا حکومت صحافی تا حق انا رکھ اکن پروٹیکشن آف جرنلسٹس اینڈ میڈیا پروفیشنلز ایکٹ 2021ء منظور کرفے، ننا حکومت ورکنگ جرنلسٹس آتون سلوک ءِ۔ داوخت آ گپ وتران کرسا وزیر مملکت حوالکاری فرخ حبیب پارے کہ سی پی این ای مچ آ ملک انا صحافی تا نمائندہ تنظیم ءِ، صوبہ غاتیٹی ڈی جی پی آرز کاریم کننگ ءِ، صوبہ غاتیٹی ہم اشتہار آتا زرتس اکن 15/85نا فارمولالاگو کننگ نا بابت ہیت کینہ۔ اوپارے کہ پوسکن آ ڈیجیٹل میڈیا پالیسی آن شفافیت ءِ مون آ دننگک۔ بنجائی وزیر حوالکاری چوہدری فواد حسین و وزیر مملکت حوالکاری فرخ حبیب سی پی این ای نا ڈل انا ویل آتے خوڑتی اٹ بنگر و اوفتے ایسر کننگ نا باور کرفیر۔ اوفک سی پی این ای نا پوسکن گچین مروک آ عہدیدار آتے مبارکباد ہم پیش کریر۔ اوڑدہی کن بروک آ سی پی این ای نا ڈل اٹی صدر کاظم خان، سینئر نائب صدر ایاز خان، سیکرٹری جنرل عامر محمود، ڈپٹی سیکرٹری جنرل یوسف نظامی، نائب صدر اسلام آباد سردار خان نیازی، جوائنٹ سیکرٹری (خیبرپختونخوا) طاہر فاروق، جوائنٹ سیکرٹری (سندھ) غلام نبی خان چانڈیو تون اوار ایلو باسک آک ہم اوار ئسر وخت اس کہ پرنسپل انفارمیشن آفیسر سہیل علی خان ہم اوڑدہی ٹی ساڑی ئسک۔
