اسلام آباد۔ 16 دسمبر (اے پی پی) پاکستان اٹ چین نا سفیر نونگ رونگ پارینے کہ گوادر فری زون نا اولیکو ریسہ پورو مسنے، ہراٹی 40 کمپنی سالانہ 3 ارب چینی یوآن نا زرکاری کریر و داسہ گوادر فری زون نا ارٹ میکو ریسہ بناکرینے۔ میڈیا تون گپ وتران کرسا اوپارے کہ سی پیک نا رداٹ داسہ صنعت و انفارمیشن ٹیکنالوجی نا بشخ آتیٹی کمکاری آ ہم چکار کننگ انگ ءِ ، گوادر ڈیہہ ٹی واپاری مرکز اس جوڑ مننگ نا کسر آ ہِننگ ءِ۔ اوپارے کہ چین نا کنڈآن گوادر اٹی تفوک آ کسبی و تکنیکی ہیلکاری مرکز پاکستانی کمامدارآتا دوٹی تننگانے وخت اس کہ گوادر ایسٹ بے ایکسپریس وے انا تفنگ ءِ ہندا تُو انا ایسر اٹ پورو کننگک۔ چینی سفیر پارے کہ نیو گوادر انٹرنیشنل ایئرپورٹ نا تفنگ ترندی اٹ برجاءِ و گمانی وڑاٹ سال 2023نا اول اٹ داڑآ فلائٹ آپریشن بناکیک۔ او پارے کہ سی پیک نا رداٹ بجلی نا قومی فراوانی ٹی اسہ چارک بشخ اس وار کننگانے، وخت اس کہ 886 کلومیٹر ٹرانسمیشن لائنز تالان کننگا۔
