پاکستان ءِ سوگو ءُ صنعتی بنداو اسے نا گرج ءِ، بنجائی وزیر چوہدری فواد حسین و مخدوم خسرو بختیار نا پریس کانفرنس

اسلام آباد۔ 15 دسمبر (اے پی پی) بنجائی وزیر حوالکاری و شینکاری چوہدری فواد حسین و بنجائی وزیر صنعت و پیدوار مخدوم خسرو بختیار ئسک پارینو کہ پاکستان ءِ سوگو ءُ صنعتی بنداو اسے نا گرج ءِ، سوگو انڈسٹریل بیس آن بیدس نن زرگزرانی ویل آتیان پیشن مننگ کپنہ، ننے امپورٹ اکانومی آن پیشن پیش تموئی مریک، بنجائی کابینہ و پنجاب حکومت اولیکو وار چنکا و نیامی درجہ نا کاروباری ادارہ (ایس ایم ایز) کن پالیسی اس منظور کرینو، ایس ایم ای بشخ اٹ 10 لکھ آن زیات ادارہ کاریم کننگ ءُ وخت اس کہ لارج اسکیل مینو فیکچرنگ اٹ 4 ہزار نا خڑک مینو فیکچرنگ یونٹ ساڑی ءُ، 78 درسد روزگار ایس ایم ای سیکٹر تون وابستہ ءُ، ایس ایم ایز ءِ مسہ درجہ لوئر رسک، میڈیم رسک، و ہائی رسک اٹ بشخنگانے، پوسکن آکاروبار اس بناکروک آتے این او سی نا دوئی کننگ اٹ آسانی مریک۔ داخیال آتا درشانی ءِاوفک چارشنبے نادے آ داڑے پریس کانفرنس آن تران کرسا کریر۔ بنجائی وزیر حوالکاری و شینکاری چوہدری فواد حسین پارے کہ نن ملکی زرگزران اٹ بھاز بھلو بدلی اس ایسونن، ننا مچ آ اکانومی نا سیبو درآمد آتیا ئس، دبئی و سنگاپور آنبار نن درآمد آتیا گزارہ کننگ کپنہ، پاکستان ءِ اسہ سوگو ءُ صنعتی بنداو اسے نا گرج ءِ۔ اوپارے کہ نن 22 کروڑ الس نا ملک اسے اُن، نن ملک اٹ سوگو انڈسٹریل بیس تننگ کتون تو زرگزرانی ویل آتیان پیشن مننگ کپنہ۔ اوپارے کہ وزارت واپار پالیسی شین تسنے ہراڑآن ایس ایم ای سیکٹر اٹ آسراتی تننگانے۔ داوخت آ بنجائی وزیر صنعت و پیدوار مخدوم خسروبختیار پارے کہ بنجائی کابینہ و پنجاب حکومت اولیکو وار چنکا و نیامی درجہ نا کاروباری ادارہ غاتا بشخ (ایس ایم ایز) کن پالیسی منظور کرینو، ایس ایم ای نا بشخ اٹ 10 لکھ آن زیات ادارہ کاریم کننگ ءُ وخت اس کہ لارج اسکیل مینو فیکچرنگ اٹ 4 ہزار مینو فیکچرنگ یونٹ ساڑی ءُ، 78 درسد نوکری ایس ایم ای سیکٹر اٹی ءُ، ایس ایم ایز ءِ مسہ درجہ غاتیٹی بشخنگانے، پوسکن آ کاروبار بناکروک آتے این او سی آن آجوئی ملا، ایس ایم ای کاروبار کروک آتے خاص آسراتی ایتنہ، ایس ایم ایز نا بشخ اٹ کاروبار کروک آ زالبول آتے خراج اٹ 25 درسد خاص رعایت تننگک، ایس ایم ایز نا بشخ اسکان رسینگ کن 23 ارب روپئی جتا کننگانے، ملک انا چندی شارتیٹی ایس ایم ایز کن 4200 ایکڑ ڈغار جتا کننگانے ہراڑے 19 ہزار 500 پلاٹ آسان قسط آتیا فراوان کننگک ، ایس ایم ایز ءِ این او سی نا دوئی کننگ کن مرغن آ وڑوڈول آن نجات دوئی مریک بنجائی وزیر مخدوم خسروبختیار پارے کہ بنجائی حکومت اولیکو وار ایس ایم ای پالیسی منظور کرینے ، ایس ایم ای پالیسی نا رداٹ پیدواری کاروبار تے خراج آتیٹی 57 درسد آن 83 درسد اسکان خاص رعایت تننگک تانکہ نئے بیرہ پیدواری خڑچ کم مرے بلکن پرافٹ مارجن ہم ودنگ کے، پاکستان اٹ کم و ود 50 لکھ 20 ہزار نا خڑک زرگزرانی یونٹ ساڑی ءُ ہرافتیان 99 درسد یونٹ چنکا و نیامی درجہ نا کاروبار آتیا تالان ءُ۔ الس نا زرگزرانی و راجی شونہالی و ملک انا جم زرگزرانی شونداری ٹی اوفتا کڑد بھاز اہم ءِ۔ اوپارے کہ داکاروبار نئے بیرہ روزگار نا فراوانی نا بنداوی ذریعہ ءِ بلکن جی ڈی پی نا 40 درسد بشخ و برآمد آتا ہم 25 درسد بشخ داکاروبار آتیان بریک۔ چنکا و بھلا زرگزرانی سرجزآتیٹی خاص اہمیت نا حامل مننگ آن پد ہم مستین اٹ داکاروبار تا راجی آسراتی کن حکومتی کہول آ ذکر انا قابل کوشست نظر بتو۔ اوپارے کہ ساڑی حکومت ہندا کاروبار تے ہروڑنا آسراتی فراوان کرسا اوفتے وتواجہی تننگ کن کوشست کننگ ءِ۔ نیشنل ایس ایم ای پالیسی 2021ء ہندا چرجوئی نا اسہ کڑی اسے۔