زرکاری بورڈ و امریکہ ٹی پاکستان نا سفارت خانہ نا تین پہ تینی شریداری اٹ آن لائن انویسٹمنٹ ویبنار پگہ(پنچ شنبے نادے آ) مریک

اسلام آباد۔ 15 دسمبر (اے پی پی) زرکاری بورڈ و امریکہ ٹی پاکستان نا سفارت خانہ نا تین پہ تینی شریداری اٹ پگہ (پنچ شنبے نادے آ) ’’پاکستان اٹی زرکاری نا وارخواہی‘‘ نا سرحال آ آن لائن انویسٹمنٹ ویبنار اس اڈ تننگ انگ ءِ ہرانا مسخت امریکہ ٹی رہینگوک آ زرکار برادری ءِ پاکستان اٹ زرکاری نا پرکشش وارخواہی تا بابت آگاہی فراوان کننگ ءِ۔ ویبنار اٹی چندی اولیتی بشخ آتیا خاص چکار کننگک ہرافتے ٹی انفارمیشن ٹیکنالوجی/آئی ٹی، آٹو، کنسٹرکشن ، ہاؤسنگ ، سیل و سوات ، فوڈ اینڈ ایگریکلچر، ہیلتھ، ای کامرس، گیگ بدل توانائی و خصوصی اقتصادی زون پین پین اوار ءُ۔ زرکاری بورڈ انا چیئرمین /وزیر مملکت محمد اظفر احسن، سیکرٹری زرکاری بورڈ و امریکہ ٹی پاکستان نا سفیر ڈاکٹر اسد مجید خان ویبنار نا بشخ ہلوک آتیان آن لائن تران کیرہ و پاکستان اٹ کاروبار و زرکاری نا پرکشش وارخواہی تے تالان کیرہ۔ تعلقدار بشخ آتا چاہندار آک ہم تینا تینا بشخ آتا بابت پالیسی و زرکاری آ تروک آ آسودہی تا بارواٹ سرجم آتے پیش کیرہ۔ یات سلے کہ ویبنار اٹی وزارت انفارمیشن ٹیکنالوجی و ٹیلی کمیونیکیشن ، انجینئرنگ ڈویلپمنٹ بورڈ، پاکستان ٹورازم ڈویلپمنٹ کارپوریشن، پوسکن آ پاکستان ہاؤسنگ ڈویلپمنٹ اتھارٹی، وزارت قومی غذائی رکھ و پٹ وپول و نیشنل یونیورسٹی سائنس و ٹیکنالوجی تون اوار ایلو چندی وزارت و ادارہ غاتا کنڈآن پاکستان اٹ کاروباری چاگڑد و زرکاری نا وارخواہی تا بابت تینا پریذینٹیشن تے پیش کیرہ۔