پاک چائنا ٹیکنیکل اینڈ ووکیشنل انسٹی ٹیوٹ گوادر ورناتے ملازمت نا وارخواہی تننگ کن تیار ءِ، چیئرمین گوادر پورٹ اتھارٹی

اسلام آباد۔ 15 دسمبر (اے پی پی) گوادر پورٹ اتھارٹی(جی پی اے) نا چیئرمین نصیر احمد کاشانی پارینے کہ پاک چائنا ٹیکنیکل اینڈ ووکیشنل انسٹی ٹیوٹ بلوچستان اٹ سی پیک نا رداٹ اولیکو شونداری ڈٹ ءِ ہرا دینی مرض آتا اِراسال اٹی ہم شیڈول آن مسہ تُو مست پورو کننگانے، انسٹی ٹیوٹ کرکی شار تیکن کسبکار انسانی وسیلہ ودی کیک، پاک چائنا ٹیکنیکل اینڈ ووکیشنل انسٹی ٹیوٹ نا بنداو ءِ 16 دسمبر 2019 آ تخنگا، تفنگ نا وخت آ او ہندی مخلوق کن 1000 آن زیات ملازمت فراوان کرے، انسٹی ٹیوٹ تون 7،350 مربع میٹر نا کل رقبہ ءِ ہراٹی خوانفنگ ماڑی، ہیلکاری ورکشاپ، ملٹی فنکشن ہالز و طالب علم و فیکلٹی اوار ءُ۔ چارشنبے نادے آ اے پی پی تون گپ وتران کرسا اوپارے کہ گوادر نا آبادی نا 50 درسد بشخ ورناتیاتالان ءِ ہرا زیات تر غریب ءُ داسہ او پاکستان اٹ جہانی لائخی اتون اوار اوار جہانی مارکیٹ اٹی بڑزکو معاوضہ والا ملازمت آتیان فائدہ ہرفنگ والا ءُ جہانی مارکیٹ اتون اوار اوار پاک چائنا ٹیکنیکل اینڈ ووکیشنل انسٹی ٹیوٹ بروک آ سال فروری ٹی گوادر نا طالب علم آتا اولیکو ٹولی ءِ بھرتی کرسا کاریم کننگ کن تیار ءِ۔دا شونداری گوادر پورٹ، گوادر فری زون نا اولیکو ریسہ و ارٹ میکو ریسہ ٹی گوادر نا ورناتیکن روزگار نا وارخواہی فراوان کیک، بندرگاہ ٹی برآمد آتیا مبنی صنعت و گوادر ماسٹر پلان نا رداٹ ایلو کاروباری سرجزودی مریک ہرا ظاہر کیک کہ کرکی شار 30 بلین ڈالر آن زیات نا اقتصادی پیدوار اتون کسبکار کارندہ و کسبی بندغ آتیکن 1.2 ملین ملازمت ودی کیک۔ دُن تو گوادر نا کم و ود 80 درسد مخلوق مچھی ہلنگ و ماہی گیری تون تعلق تخرہ، ہنداخاطرآن ایلو تکنیکی تربیت اتون اوار اوار ، انسٹی ٹیوٹ گوادر نا ورناتے ماہی گیری نا پوسکن آ وڑوڈول ، کشتی و بندرگاہ اٹی مچھی تے سنبھالنگ آن مست انا کسبی معلومدار فراوان کیک۔ پوسکن آ مچھی تا جال انا جوڑ کننگ، مچھی تا رکھ، جہاز جوڑ کننگ، خور انا رکھ ، کاروباری تکنیک و کاروبار کن پاکستانی و چینی کانود آن آگاہی تننگک۔ گوادر نا نیزگار تپہ غان تعلق تخوک آ کم و ود 400 طالب علم آتا اولیکو ٹولی گوادر پورٹ اتھارٹی و چائنا اوورسیز پورٹ ہولڈنگ کمپنی(سی اوپی ایچ سی) نا خصوصی کوشست آتیان سی پیک نا رداٹ 83 ملین یوآن نا خڑچ آن اکتوبر 2021اٹی چین نا کمک اٹ تفوک آ پاک چائنا ٹیکنیکل اینڈ ووکیشنل انسٹی ٹیوٹ اٹی مفت داخلہ دوئی کیک۔ پاک چائنا ٹیکنیکل اینڈ ووکیشنل انسٹی ٹیوٹ نا پروجیکٹ ڈائریکٹر سہیل اصغر پارے کہ تکنیکی و کسبی تعلیم، ہاسٹل و ایلو تعلقدار آسراتی تتون اوفتے مفت فراوان کننگک۔ گوادر نا ورناک(نرینہ و نیاڑی) اسہ چنکو ماہی گیری نا شار اسے پوسکن آ سمارٹ سٹی ٹی بدل کننگ نا ایجنٹ جوڑ مریک ۔ اوپیدوار کرے کہ مسہ سالہ کورس اٹی طالب علم آک اسہ سال اس پاک چائنا ٹیکنیکل اینڈ ووکیشنل انسٹی ٹیوٹ گوادر اٹی گدریفرہ و یک و نیم سال چین نا شان ڈونگ انسٹی ٹیوٹ آف کمرشل ٹیکنالوجی ٹی گدریفرہ۔ اوکان پد طالب علم آک چین اٹی کورس آتون تعلقدار صنعت اٹی انٹرنی نا وڑاٹ عملی آزموندہ ہیل کیرہ۔ اوپارے کہ ہائی ٹیک کسبی تعلیم آن آراستہ مرسا، گوادر نا ورناتا گوادر اٹی بھاز زیات مانگ مریک، ہرا اسہ اقتصادی و لاجسٹک مرکز اس جوڑ مننگ تون اوار اوار چین و مچ آ دنیا ٹی درملکی کمپنی ہم مریک۔ تعمیراتی کاریم آن بیدس پاک چائنا ٹیکنیکل اینڈ ووکیشنل انسٹی ٹیوٹ اٹ چندی تعلقدار کاریمک 168.532 ملین روپئی نا خڑچ آن برجا ءُ ہرافتیان 60 ملین روپئی خڑچ مسنے۔ اوپارے کہ ایلو 107 ملین روپئی منظوری کن زیر التواءُ۔