بنجائی کابینہ و پنجاب حکومت اولیکو وار ایس ایم ای سیکٹر کن پالیسی منظور کرینو، دا بشخ اٹی 10 لکھ آن زیات ادارہ کاریم کننگ ءُ، بنجائی وزیر صنعت و پیدوار مخدوم خسرو بختیار

اسلام آباد۔ 15 دسمبر (اے پی پی) بنجائی وزیر صنعت و پیدوار مخدوم خسرو بختیار پارینے کہ بنجائی کابینہ و پنجاب حکومت اولیکو وار چنکا و نیامی درجہ نا کاروباری ادارہ غاتا بشخ (ایس ایم ای) کن پالیسی منظور کرینو، دا بشخ اٹی 10 لکھ آن زیات ادارہ کاریم کننگ ءُ وخت اس کہ لارج اسکیل مینو فیکچرنگ اٹ 4 ہزار مینو فیکچرنگ یونٹ کاریم کننگ ءُ، 78 درسد نوکری ایس ایم ای سیکٹر اٹی ءُ، ایس ایم ایز ءِ مسہ درجہ غاتیٹی بشخنگانے، پوسکن آ کاروبار بناکروک آتے این او سی آن آجوئی ملا، ایس ایم ای کاروبار کروک آتے خاص آسراتی ایتنہ، ایس ایم ایز نا بشخ اٹی کاروبار کروک آ زالبول آتے خراج اٹ 25 درسد خاص رعایت تننگک، دا بشخ انا مالیات اسکان رسینگ کن 23 ارب روپئی جتا کننگانے، ملک انا چندی شار تیٹی ایس ایم ایز کن 4200 ایکڑ ڈغار جتا کننگانے ہراڑے 19 ہزار 500 پلاٹ آسان قسط آتیا فراوان کننگک، ایس ایم ایز ءِ این او سیز نا دوئی کننگ نا مرغن انگا وڑوڈول آن نجات دوئی مریک۔ داخیال آتا درشانی ءِ او چارشنبے نا دے آ بنجائی وزیر حوالکاری و شینکاری چوہدری فواد حسین تون اوار پریس کانفرنس آن تران کرسا کرے۔ مخدوم خسرو بختیار پارے کہ بنجائی حکومت اولیکو وار ایس ایم ای پالیسی ءِ منظور کرینے، داپالیسی نارداٹ پیدواری کاروبار تے خراج آتیٹی 57 درسد آن 83 درسد اسکان خاص اِلنگک تانکہ نئے بیرہ پیدواری خڑچ کم مرے بلکن پرافٹ مارجن ہم ودنگ کے، پاکستان اٹ کم و ود 50 لکھ 20 ہزار نا خڑک زرگزرانی یونٹ ساڑی ءُ ہرافتیان 99 درسد یونٹ سمال اینڈ میڈیم (چنکا و نیامی) درجہ نا کاروبار آتیا تالان ءِ، الس نا زرگزرانی و راجی شونہالی و ملک انا جم زرگزرانی شونداری ٹی اوفتا کڑد بھاز اہم ءِ۔ اوپارے کہ داکاروبار نئے بیرہ روزگار نا فراوانی نا بنداوی ذریعہ ءِ بلکن جی ڈی پی 40 درسد بشخ و برآمد آتا ہم 25 درسد بشخ دا کاروبار آتیان بریک، چنکا و بھلا زرگزرانی سرجزآتیٹی خاص اہمیت تخنگ آن پد ہم مستین اٹ دا کاروبار تا راجی آسراتی کن حکومتی کہول آ قابل ذکر کوشست نظر بتو ۔ اونا پاننگ ئس کہ ساڑی حکومت ہندا کاروبار تے ہروڑنا آسراتی فراوان کرسا اوفتے وت واجہہی تننگ کن کوشست کننگ ءِ، نیشنل ایس ایم ای پالیسی 2021ہندا چرجوئی نا اسہ کڑی اسے، دا پالیسی نا مرکزی مسخت چنکا و نیامی تپہ نا کاروبار کروک آتیکن آسانی ودی کننگ ءِ۔