اوغانستان ءِ انسانی تنکی مون تروک، بنداوی انسانی حق ءِ خطرہ مون تروک ءِ، اقوام متحدہ

اسلام آباد۔ 15 دسمبر (اے پی پی) اقوام متحدہ ناانسانی حق کونسل خبڑدار کرینے کہ اوغانستان نا الس ءِ اسہ بھلو انسانی تنکی اسے نا مون تروک ءِ ہراڑآن بنداوی انسانی حق ءِ خطرہ مون تروک ءِ۔ اوغانستان اٹی انسانی حق انا حالیت آتیا اسہ اپ ڈیٹ اسے ٹی اقوام متحدہ نا انسانی حق انا ڈپٹی کمشنر نداالناشف پارے کہ جنگ زدہ ملک اٹ پابندی تا اثر و ریاستی میرات آتے منجمد کننگ نا سوب آن حالیت آک پین پیچیدہ مسنو۔ اوپارے کہ بینکنگ سسٹم نا چٹفنگ و لیکوڈیٹی نا تنکی زرگزرانی زند ءِ بھلو حد اسکان ژند کرینے، یخ انا موسم نا بننگ تون زالبول ، نرینہ و چناتے نیزگاری و بین تون مون تروئی تمنگ ءِ۔ اوکونسل ءِ پارے کہ اگست اٹ طالبان تا کوزہ غان مست داسال ریکارڈ آ غٹ آن زیات شاری تا زوال کننگ مون آ بسنے ہرافتے ٹی نیمہ نا خڑک زالبول و چناک ءُ۔ جہانی ادارہ نا عہدیدار اس پارے کہ اوغانستان نا شاریک جھیڑہ غاتا خطرہ غان دوچار ءُ انتئے کہ داسہ ہم داعش خراسان و ایلو سلہہ بند پڑک آتا کنڈآن مہلک جلہو کننگ انگ ءِ، ساڑی حالیت آتیٹی شاری تے انسانی حق انا بابت بھاز کم رکھ دوئی ءِ خاص وڑاٹ زالبول و مسن تے تعلیم، زرگزران و بشخ ہلنگ نا حق انا بابت بھلو غیر یخینی حالیت مون تروک ءِ۔ اواقوام متحدہ نا تازہ انگا حساب وکتاب نا حوالہ ءِ ترسا پارے کہ 4.2 ملین اوغان چناتیان 60 درسد مسنک مہالو آن اسکول آتیان پیشن ءُ و استاد آتا تنخواہ تا زرتفننگ و پین 8.8 ملین چناتا تعلیم آن محروم مننگ نا خطرہ غان دوچار ءُ۔ داوخت آ او اوغان جج، پراسیکیوٹر و وکیل آتا رکھ آہم زور شاغا۔