فیصل آباد۔ 15 دسمبر (اے پی پی) چائنہ پاکستان اقتصادی راہداری نا رداٹ خصوصی صنعتی زون تا جوڑ کننگ آن ملک اٹی زرگزرانی انقلاب و اقتصادی و زرگزرانی سوگوی بناکیک وخت اس کہ اقتصادی راہداری نا ہندا ڈٹ حکومت نا اہم ءُ گام اسے ہراڑآن توانائی نا کمتی چٹک و تباہ حال ملکی انفراسٹرکچر ءِ بحال کننگ اٹ ہم کمک رسینگک۔ آل پاکستان ٹیکسٹائل پراسیسنگ ملز ایسوسی ایشن نا چیئرمین انجینئر حافظ احتشام جاوید میڈیا تون گپ وتران اٹی پارے کہ سی پیک نا رداٹ غٹ ڈٹ آتیا ترندی اٹ کاریم برجاءِ ہرانا فائدہ زوت ملک وقوم ءِ ملنگ بناکیک نیز سی پیک نا رداٹ زون جوڑ مننگ نا فائدہ نئے بیرہ چین بلکن پاکستان ءِ ہم مریک ہنداخاطرآن ہندی صنعت کار آتے مرے کہ او دا خصوصی صنعتی زون تیٹی زرکاری کیر ہرانا بھلو فائدہ ءُ۔ اوپارے کہ گوادر بندرگاہ آن چین نا بھلوکچ اسے آ برآمد آتا بنا و دے ٹک نیامی و افریقہ اسکان مریک۔ اوپارے کہ سی پیک ڈٹ آتا تفنگ و پوروی ٹی غٹ آن بھلا کڑد ننا حساس ادارہ غاتا ءِ ہرافک سی پیک نا رداٹ زیر تعمیر ڈٹ آتیٹی کاریم کروک آ چینی ورکرآتے فول پروف سیکورٹی فراوان کرے و ہندا سوب آن مچ آ دنیا غان زرکارآک پاکستان آ بننگ ءُ۔ اوپارے کہ داوخت آ ملک انا غٹ آن بھلا ویل بیروزگاری ءِ ہنداخاطرآن حکومت ءِ مرے کہ او زمینی راستکی تار داٹ زرگزرانی پالیسی جوڑ کے تانکہ صنعت آتے مون آ دننگ دوئی و بیروزگاری ءِ چٹفنگ مرے۔ اوپارے کہ صنعت آتیٹی ودکی آن ورکرزآتا کھپت ودک ہنداخاطرآن اخس زیات صنعت جوڑ مریک ہموخس ہی بیروزگاری چٹک ولے داڑکن ورناتے ٹیکنیکل ایجوکیشن نا کنڈآ چکار کروئی مریک۔
