لاہور۔ 14 دسمبر (اے پی پی) صدر مملکت ڈاکٹر عارف علوی پارینے کہ پاکستان اٹ آب اٹ تعلیم و اخلاقی قدر انا گچینی آن جان جوڑ راج اس ٹہینگ ءِ ولے ساڑی آ دور انا خواست آتا رداٹ زالبول آتے ہم نرینہ غاتون ہم کوپہ ہربشخ اٹ بریبر کڑد ادا کروئی مریک تانکہ ملک پین شون و سوگوی نا کنڈآ ہِننگ کے، شون ہلوک راج مادہ پرستی نا کنڈآ راغب ءِ ہرانا سوب آن اوفتا اخلاقی قدر مفننگ نا بریبر ءِ ، آئیڈیل لائف کن ننے تینا اخلاقی قدر و دودوربیدگ میرات آتے مون آ دروئی مریک ہراڑکن نرینہ غاتون اوار اوار زالبول آتے ہم میدان عمل اٹ بروئی مریک۔ اوسے شنبے نادے آ لاہور کالج فار وویمن یونیورسٹی نا 16 می کانووکیشن نا دود آن تران کریکہ۔ گورنر پنجاب چوہدری محمد سرور ، وائس چانسلر لاہور کالج فار ویمن یونیورسٹی ڈاکٹر بشریٰ مرزاتون اوار تعلیمی شخصیت و طالب علم آتا بھلو کچ اس ہم داوخت آ ساڑی ئسر۔ صدر مملکت ڈاکٹر عارف علوی پارے کہ بابائے قوم قائد اعظم محمد علی جناح ، علامہ ڈاکٹر محمد اقبال و سرسید احمد خان نا رغاموک آتیا عمل کرسا ہی نن اسہ حقی ءُ اسلامی ، آسودہی، نظریاتی و خوانوک ءُ قوم اس مرسا مون آ بننگ کینہ انتئے کہ او فک مدام نرینہ غاتون ہم کوپہ زالبول آتے ہم قومی دنگ اٹ اوار مننگ کن تعلیم ءِ تینا شعار کننگ نا پارت کریر۔ صدر مملکت پارے کہ خوانوک و باشعور سوسائٹی محکم و سوگو ملک انا بنداو ءِ تخنگ اٹ اہم ءُ کڑد اس ادا کننگ کیک ہنداخاطرآن داوڑنا سوسائٹی بایدے مون آ برے خاص وڑاٹ زالبول آتا تعلیم کن داوڑنا گام گیج مرے تانکہ او ہم ملکی شونداری ٹی تینا کڑد ءِ ادا کننگ کیر۔ اوپارے کہ جوان و خوانوک آ سوسائٹی نا ٹہیفنگ کن جوان انگا خاہوت نا مننگ المی ءِ ہرا خوانوک و لائخ بندغ آتا سوب آن جوڑ مریک، ننے مرے کہ قومی تعمیر آ چکار تننگ کن زیات آن زیات تعلیم دوئی کین و نرینہ غاتون اوار اوار زالبول آتے ہم زند انا ہر بشخ اٹ اوار کین تانکہ او ہم خودانحصاری اٹ دا راج اٹ تینا ہند اس جوڑ کننگ اٹ سرسہب مننگ کیر۔ اوپارے کہ ننا راج ءِ اخس گرج نرینہ غاتا ءِ ہموخس زالبول آتا ہم ارے انتئے کہ ساڑی آ دور اٹی شون ہلوک ملک آتیٹی زالبول آک ہم نرینہ غاتون ہم کوپہ زند انا ہربشخ اٹی تینا زمواری تے سرایترہ ہراڑآن اسہ زیبا ءُ و جان جوڑ ءُ راج اس ودی مریک۔ اوپارے کہ زالبول آک نرسز آئی ٹی تون اوار غٹ بشخ آتیٹی تینا بشخ ءِ شاغر و تعلیم دوئی کیر وخت اس کہ دا چرجوئی ٹی تعلقدار ادارہ غاتے پارت ہم تننگانے کہ تعلیمی ادارہ غاتا کاریم نا کچ ءِ ودفنگے و طالب علم آتے زیات آن زیات آب اٹ و پوسکن آ تعلیم نا فراوانی نا وارخواہی فراوان کننگے۔ اوپارے کہ آخبت خڑک اٹ غیررسمی تعلیم نا بشخ ملازمت نا منڈی ٹی طلب نا سوب آن ودک، پروفیشنل تعلیم دوئی کروک آ طالب علم آک تینا لائخی اتون خذمت کرسا اونا بھرم تے قوم ءِ پدی ایتر وخت اس کہ راج انا ہم دا فرض ءِ کہ او زالبول آتے تینا زند اٹ شونداری نا وارخواہی ایتر۔ اوپارے کہ پیشن نا ملک رہینگوک آ پاکستانیک تینا ملک اتون پیار و مریبت تخرہ انتئے کہ اوملکی شونداری ٹی اہم ءُ کڑد اس ادا کننگ ءُ۔
