اسلام آباد۔ 14 دسمبر (اے پی پی) وزیرخارجہ شاہ محمود قریشی پارینے کہ پاکستان نا مہمانداری ٹی ، اسلامی کمکار تنظیم ، او آئی سی وزرائے خارجہ کونسل نا بھلا دیوان 19 دسمبر آ اسلام آباد اٹی مریک۔ دیوان اٹی جہانی و علاقائی تنظیم تے ہم بٹنگ انگ ءِ، دیوان، اوغان الس نا انسانی گرج آتے پورو کننگ کن پبی گام گیج آتیا سجفنگ نا جوان ءُ موقع اس فراوان کیک۔ سے شنبے نادے آ او آئی سی وزرائے خارجہ کونسل نا 19 دسمبر آ اسلام آباد اٹی اڈ ہلوک آ بھلا دیوان نا بابت وزیرخارجہ تینا اسہ بیان اسےٹی پارے کہ دا بھلا دیوان نا مسخت ، اوغانستان نا بھلا انسانی حالیت آتیا سجفنگ و گچین لائحہ عمل اس طے کننگ ءِ۔ اقوام متحدہ نا کساس نا رداٹ، داوخت آ اوغانستان نا 38 ملین بندغ آن 50 درسد ءِ ’’ بین نا سنگین تنکی‘‘ مون تروک ءِ و دا حالیت آک دے پہ دے بدترمرسا کننگ ءُ۔ ورلڈ فوڈ پروگرام خبڑدار کرینے کہ اوغانستان اٹی 3.2 ملین چناک غذائی کاختی نا خطرہ غاتا گواچی ءُ۔ مخدوم شاہ محمود قریشی پارے کہ یواین او سی ایچ اے نا رداٹ ، جنوری و ستمبر 2021 نا نیام اٹ 665،000 پوسکن آ بندغ آک اوغانستان اٹی بے اُرا مسنو۔ داکان مست، اوغانستان اٹی اندرونی وڑاٹ بے اُرا مروک 2.9 ملین بندغ دافتیان بیدس ءُ۔ پاکستان، تینا کچ اٹنگا وسیلہ غاتیان پد ہم، تدوک آ کیہی دہائی آن 40 لکھ اوغان باہوٹ آتا مہمانداری ءِ کننگ ءِ، شاہ محمود قریشی پارے کہ یخ انا بننگ اوغانستان نا حالیت آتے پین گھمبیر کرینے۔ اگہ داحالیت آتیا وخت آ چکار کننگتو تو اسہ بھلو انسانی تنکی اس ودی مننگ کیک۔ اوغانستان او آئی سی نا بانی باسک آتے ٹی اوار ءِ۔ امت مسلمہ نا بشخ مننگ نا ناطہ، نن اوغانستان نا مخلوق اتون سنگتی و ایلمی نا برادرانہ بندھن تیٹی تفوک اُن۔ او آئی سی مدام اوغانستان نا الس نا مخ تفی ءِ کرینے۔ اینو مست آن کیہی زیات اوغان الس ءِ او آئی سی تون اوار جہانی برادی نا مخ تفی نا گرج ءِ۔ شاہ محمود قریشی پارے کہ پاکستان دا رداٹ پدریسہ تینا سفارتی کوشست آتے برجاتخانے۔ وزیراعظم عمران خان نا جہانی راہشون آتون اوغانستان نا حالیت آتیا رابطہ مسنے وخت اس کہ ای تینٹ، علاقائی کہول آ اسیجائی لائحہ عمل نا مون آ دننگ کن اوغانستان نا خڑک انا ہمسایہ ملک (ایران، تاجکستان، کرغزستان، و ترکمانستان ) نا دورہ ءِ کرینٹ، پاکستان نا سفارتی کوشست آتیان، اوغانستان نا شش ہمسایہ ملک آتا پلیٹ فارم اس جوڑ مسنے۔ شاہ محمود قریشی پارے کہ ماسکو فارمیٹ دیوان اٹ بشخ ہلنگ و ٹرائیکا پلس دیوان نا مہمانداری ہم ہموسفارتی کوشست آتا چرجوئیءِ۔ اوغانستان نا حالیت آتیا جہانی برادری ءِ گڑتی ءِ۔ مسلم امہ نا اجتماعی توار نا وڑاٹ، او آئی سی، انسانی تنکی نا مون ءِ توننگ اٹ، ننا اوغان ایلم تا کمک ءِ کننگ کیک۔ او آئی سی نا سرکڑدہ ایلو جہانی ادارہ/ تنظیم تے مون آ بننگ و اوغان الس نا کمک ءِ کننگ کن دوتے مون آ اتنگ نا ترغیب تننگ اٹ گچین ثابت مننگ کیک، مخدوم شاہ محمود قریشی پارے کہ اوغانستان اٹی انسانی تنکی نا چٹفنگ نا کمک اٹ زرگزرانی سوگوی ءِ پک کننگ اٹ کمک ملنگ کیک۔ ساڑی حالیت آتیٹی اوغانستان تون جہانی برادری نا پدریسہ کمکاری المی ءِ۔ داپس منظر اٹ 19 دسمبر آ اسلام آباد اٹی اڈ ہلوک آ او آئی سی نا بھلا دیوان، اوغان الس نا انسانی گرج آتے پورو کننگ کن پبی گام گیج آتیا سجفنگ نا جوان ءُ موقع اس فراوان کیک۔
