اسلام آباد۔ 14 دسمبر (اے پی پی) وزیرخارجہ شاہ محمود قریشی پارینے کہ وڈی خوری نیزگاری نا چٹفنگ، زند ءِ آب اٹ جوڑ کننگ و مخلوق ءِ آب اٹ جان جوڑی و تعلیم نا فراوانی ٹی بنداوی ءُ اڑنگ اسے۔ جہانی برادری مچ آ دنیا نا مخلوق نا گچین آخبتءِ پک کننگ کن وڈی خوری نا چیلنج اتون گچین وڑاٹ مون ایتے۔ سے شنبے نادے آ مصر انا سیل و سواتی ہند شرم الشیخ اٹ اقوام متحدہ نا وڈی خوری نا برخلاف کنونشن نا بابت ریاستی جماعت آتا کانفرنس نا نہہ می دیوان آن ورچوئل تران کرسا وزیرخارجہ پارے کہ کوویڈ۔ 19 نا جہانی دین وڈی خوری نا لعنت آن ودی مروک آ بے بریبری ءِ بے نقاب کرینے۔ وزیرخارجہ مچ آدنیا ٹی مخلوق نا گچین آخبت ءِ پک کننگ کن وڈی خوری نا چیلنج اتون گچین وڑاٹ مون تننگ آ زور شاغا۔ وڈی خوری نا توننگ و اوڑتون مون تننگ کن حکومت نا کنڈآن کروک آ گام گیج آتے تالان کرسا وزیرخارجہ پارے کہ پاکستان احتساب ، شفافیت و سوگوی نا غرض اٹ سوگو نظام نا جوڑ کننگ و اودے سوگو کننگ کن چندی گام گیج کرینے۔ پاکستان سرکاری بشخ آتیٹی شفافیت ءِ مون آ دننگ کن ساڑی کانود سازی کرینے ہراٹی شاری تا معلومداری نا حق انا دوئی کننگ اٹ آسراتی فراوان کننگ ہم اوار ءِ۔ پاکستان وڈی خوری تون مون تننگ کن آئی سی ٹی ٹولز ءِ ہم کاریم اٹ اتنگ ءِ ہراٹی پاکستان سٹیزن پورٹل ایپلی کیشن ہم اوار ءِ تانکہ حکومتی ادارہ و پبلک آفس ہولڈرآتا شریداری وڑ حکمرانی و احتساب ءِ مون آ دننگ مرے۔ وزیرخارجہ ’’رکھ مالیاتی پناہ گاہ‘‘ تے ہم تالان کرے ہرا وڈی خور آتا احتساب کننگ نا کوشست آتے بے سہب کرینے۔ وزیرخارجہ ریاستی جماعت آتا کانفرنس آ زور شاغا کہ او سنگین زرگزرانی ناانصافی ءِ توننگ کن دولت نا غیرکانودی ترسیل ءِ توننگ کن اسہ جامع کانودی فریم ورک اس تیار کے انتئے کہ ساڑی آ جہانی انسداد وڈی خوری نا فریم ورک دُزی مروک میرات آتا بازیابی و پدتموک ملک آتے اوفتا پدی تننگ ءِ گچین وڑاٹ پک کننگ کن بس اف۔ او دُزی مروک میرات آتا پدی اتنگ نا کسر اٹ بروک اڑاند آتے مر کننگ کن سوگو سیاسی عزم انا گرج آ زور شاغا ہرا معلومداری نا وخت آ شریدار، انتظامی و کانودی وڑوڈول ءِ آسان کننگ و بے گرج تاخیر آن بچساکننگ مریک۔
