اسلام آباد۔ 14 دسمبر (اے پی پی) وزیر مملکت حوالکاری و شینکاری فرخ حبیب پارینے کہ شہباز شریف رزاک اٹ ڈٹ بندی نا رداٹ سلمان شہباز ءِ پاکستان آن نرنگ نا موکل تس۔ وزیر مملکت تینا ٹویٹ اٹی پارے کہ شہباز شریف نروک آ سلمان شہباز ءِ پاکستان آ پدی بٹنگے و عدالت آتا مون آ پیش کے۔ فرخ حبیب پارے کہ ن لیگ قوم انا پلوک آ دولت نا حساب ءِ ایتے۔ وزیر مملکت پارے کہ 2008 آن 2018 ٹی شہباز شریف پنجاب نا وزیراعلیٰ ئس، حمزہ شہباز و نروک آ سلمان شہباز تینا شوگر مل آتا چپراسی، کلرک آتا پن آ 28 اودیم اکاؤنٹ جوڑ کریر۔ اوپارے کہ دا اودیم اکاؤنٹ آتا کمک اٹ 16 ارب روپئی آن زیات نا ناروا دولت و کرپشن ءِ ڈکھنگا ۔ وزیر مملکت پارے کہ اسہ دہ ئی اسے نا کرپشن کپننگ نا دعویدار ارب آ روپئی نا کرپشن اٹ اوار پیش تما۔
