اسلام آباد۔ 13 دسمبر (اے پی پی) وزیراعظم عمران خان پارینے کہ کانود نا حکمرانی مف تو گچین کاری تیٹی واکدار، وارڈلارڈز و کسبی ڈوہدار بندغ آک مون آ بریرہ، پدتموک ملک آتا پدی سلنگ نا سوب کرپشن و اشرافیہ نا وڈی خوری ءِ، پاکستان دہشت گردی نا برخلاف جنگ اٹ غٹ آن زیات نسخان ہرفے، بے سہبی نا ملبہ ءِ ہم ننا زی آ شاغنگا، داسہ ہم اوغانستان اٹ مرغن خانہ جنگی مسکہ تو اونا مچ آ دوبہ پاکستان آ بسکہ، بھارت کشمیر اٹ انتس کہ کننگ ءِ دیکی اوڑآ تنقید کپک اگہ پین ملک اس داوڑ کریکہ تو بھاز شور مسکہ، ننا ملک اٹی اردو میڈیم،انگلش میڈیم و دینی مدرسہ غاتا تعلیم مسہ وڑنا نظام چلینگ انگ ءِ، غیر مساوی شونداری بے چیٹی نا سوب مریک، ننے تھنک ٹینکس نا کمک اٹ نن تینا سہی تشخص و حقی نکتہ نظر ءِ دنیاغا بایدے پیدوار کین۔ داخیال آتا درشانی ءِ او دوشنبے نادے آ پالیسی ریسرچ انسٹیٹیوٹ نا کنڈآن مارگلہ ڈائیلاگ نا دودآن تران کرسا کرے۔ وزیراعظم پارے کہ قوم تا نیام اٹ پرخ کانود نا حکمرانی نا ءِ۔ غریب ملک آتیٹی وسیلہ غاتا کمتی نیزگاری نا سوب اف بلکن کانود نا حکمرانی آن راج اٹ میرٹ و تہذیب شون ہلیک۔ جمہوریت ہموڑے سوگو مریک ہراڑے کانود نا حکمرانی مرے۔ اگہ کانود نا حکمرانی مف تو گچین کاری تیٹی واکدار، لارڈز و کسبی ڈوہدار بندغ آک مون آ بریرہ۔ کانود ناحکمرانی داوڑنا کسبی ڈوہدار بندغ آتے مون آ بننگ آن تورک۔ وزیراعظم پارے کہ وڈی خوری کانود نا حکمرانی مفننگ نا اسہ نشانی اسے۔ پدتموک ملک آتا پدی سلنگ نا سوب کرپشن و اشرافیہ نا وڈی خوری ءِ۔ ننا ملک اٹ پٹ وپول نا بشخ اٹ بھاز کم کاریم مس انتئے کہ پٹ وپول آن حقی سوچ شون ہلیک انتئے کہ اگہ پٹ وپول مف تو ولدا ایلومخلوق ننا بارواٹ تینا سلاہ ءِ قائم کیرہ۔ نن تینا سلاہ اٹ راستکی تے مون آ اتنگ کپنہ۔ وزیراعظم پارے کہ پاکستان اوغان جنگ اٹ امریکہ نا سیوتی مس ولے بے سہبی نا مچ آ ملبہ ءِ پاکستان آ شاغنگا۔ دہشت گردی نا برخلاف جنگ اٹ پاکستان 80 ہزار جان تا قربانی تس۔ امریکہ نا پین سیوتی سے نا داخہ در نسخان متو۔ 30 آن 40 لکھ بندغ بے اُرا مسر وخت اس کہ ننا زرگزران ءِ 100 ارب ڈالر آن زیات نا نسخان مس۔ غلطی اوتینٹ کریرہ و مورد الزام پاکستان ءِ گوندارہ۔ نن دا دوبہ غاتا داسوب آن ورندی ءِ تننگ کتونہ انتئے کہ ننا ملک انا سرکڑدہ غاتا راہشونی ءِ کننگ کن ہچ ءُ تھنک ٹینک اس ساڑی الوکہ۔ ویل آتا ایسری کن ننے لیڈرشپ انا کمتی مون تروک ئس۔ اوپارے کہ داسہ ہم اوغانستان اٹی اگہ مریس خانہ جنگی مسکہ تو اونا مچ آ دوبہ پاکستان آ بسکہ ولے اللہ تعالیٰ ننے داڑآن رکھانے۔ وزیراعظم پارے کہ پاکستان کن دابھاز سبکی نا ہیت اس ئس کہ نن ہرافتے تون تفینہ اوننے سیوتی ہم گونداکہ، ننا زی آ بمباری ہم کریکہ، ننا مخلوق نا جونک ہم زیان مسرہ ولے دوبہ ہم ننے آ لگاکہ و اوڑتون اوار اوار امداد تننگ نا ہیت ہم کننگاکہ۔ وزیراعظم پارے کہ ہمووخت آ ننا ملک ہم اِرا تپہ غاتیٹی بشخنگاسس۔ اسہ تپہ امریکہ نا مخالف ئس و ایلو امریکہ نا مخ تفی ٹی مون آ بس ہرانا سوب آن نن تینا نکتہ نظر ءِ داوڑاٹ دنیا نا مون آ اتنگ ہی کتون۔ وزیراعظم پارے کہ مسلمان دنیا ٹی داوڑنا تھنک ٹینکس ساڑی الوکہ ہرا دا ورندی ءِ تسکہ کہ اسلام و دہشت گردی نا اسہ ایلوتون ہچ ءُ تعلق اس اف۔ مچ آ دنیا ٹی اسلاموفوبیا نا زموار نن افن۔ اسہ مذہب اس ہم دہشت گردی نا موکل تفک۔ انسانی راج اٹی انتہاپسند، اعتدال پسند و آزاد خیال ہروڑنا مخلوق مریک ولے مذہب نا تو دہشت گردی تون ہچ ءُ تعلق اس مفک۔ دیکی ٹی رہینگوک آ مسلمان تے نائن الیون آن پد بھاز مشکل آتون مون تروئی تما ولے دنیا ٹی مسلمان سرکڑدہ غاتا کنڈآن دابابت ہچ ءُ ورندی اس مون آ بتو۔ وزیراعظم پارے کہ بھارت کشمیر اٹ انتس کہ کننگ ءِ دیکی اوڑآ تنقید کپک ولے اگہ پین ملک اس داوڑ کریکہ تو بھاز شورمسکہ۔ ننا تھنک ٹینکس مسکہ تو او دا باندات ءِ پبی وڑاٹ تالان کریکہ۔ ہندوستان اٹ نسل پرست حکومت اسہ بدبختی اسے ہرانا فاشٹ پالیسی ءُ و اقلیت آتون ناروا سلوک کننگ انگ ءِ۔ داوخت آ بھارت اٹ اقلیت آتے مشکل مون تروک ءِ۔ وزیراعظم پارے کہ ننا ملک اٹی آب اٹ تھنک ٹینکس نا گرج ءِ تانکہ گچین پٹ وپول نا کمک اٹ سہی وڑاٹ قومی بیانیہ ءِ مون آ اتنگ مرے۔ اوپارے کہ درملکی تھنک ٹینکس انتہاپسندی نا سوچ تخوک زموار آتے مچ آ راج انا ڈیک تکک۔ وزیراعظم پارے کہ ننا دین لس مخلوق ءِ متاثر کیک۔ ننا سوگو خاہوتی و مذہبی نظام اسے۔ نناداڑے ہم انتہاپسندی نا سوچ تخوک ءُ مخلوق ارے، ولے اونا سوب دادے کہ نن غیر منصفانہ نظام تعلیم ءِ سہی کتون۔ وزیراعظم پارے کہ پٹ وپول ءِ مون آ دننگ نا گرج ءِ۔ تھنک ٹینکس نا ہندن ہندن ساکھ ودک ننکن آسانی ودی مرسا کیک۔ ہراتم پیشن نا ملک پاکستان نا برخلاف مہم اس چلینگک تو سمندر پار پاکستانی تے بھاز مشکل مون تروئی تمک۔ آب اٹ تھنک ٹینکس نا کمک اٹ نن تینا سہی تشخص و حقی نکتہ نظر ءِ دنیاغا بایدے پیدوار کین۔
