جاپان نا پاکستان پولیو پروگرام کن 4.35 ملین ڈالر امداد نا پڑو

اسلام آباد۔ 13 دسمبر (اے پی پی) حکومت جاپان پاکستان اٹ پولیو مہم آتیکن ویکسین نا ہلنگ کن 4.35 ملین ڈالر امداد نا پڑو کرینے، دا امداد ءِ 24 ملین ویکسین خور آتا ہلنگ کن کاریم اٹ اتنگک، امداد آن پولیو کن حساس گوندنگوک آ ضلع غاتیٹی پنچ سال اسکان نا 21 ملین چناتا ویکسینیشن ممکن مننگ کیک، نیشنل ایکشن پلان 2021-23نا رداٹ مچ آ پاکستان آن 2023نا ایسر اٹ پولیو دین انا پورو چٹفنگ نا ہدفءِ۔ دوشنبے نادےآ جاری مروک بیان نا رداٹ معاہدہ نا دستاویز آتیا حکومت جاپان و چناتا جہانی ادارہ یونیسیف نا نیام اٹ دستخط مس و کمکی معاہدہ غا جائیکا و یونیسیف دستخط کرینو۔ قومی ایمرجنسی آپریشنز سینٹر نا کوآرڈنیٹر ڈاکٹر شہزاد بیگ پارینے کہ ’’کورونا دین آن پد ہم پاکستان دا سال گچین کارکڑد نشان ترسا پولیو دین نا مون ءِ تورینے و سال 2023نا ایسر اٹ پولیو دین نا غٹ وڑتا چٹفنگ ءِ ممکن کننگ انگ ءِ‘‘۔ جاپان نا پولیو پروگرام اٹ کمکاری نا بارواٹ پارسا اوپارے کہ ’’نن پاکستان نا چناتے موذی ناجوڑی آن بچفنگ آ جاپان نا الس نا منت واراُن۔ دا امداد آن نن چناتے ویکسین نا فراوانی ءِ ممکن کینہ۔ داوخت آ جاپان نا سفیر ایچ ای واڈامٹسو ہیرو حکومت پاکستان نا پولیو نا چٹفنگ کن کروک آ کوشست آتا ستاءِ کرسا پارے کہ نن پاکستان آن پولیو نا چٹفنگ آن اسہ گام انا فاصلہ غاٹی اُن۔ اوسال 2023نا ایسر اسکان پولیو دین انا پورو چٹفنگ نا ذکر ءِ کرسا پارے کہ ’’جاپان پولیو نا چٹفنگ و رکھی ٹیکہ غاتا چرجوئی ٹی تدوک آ کیہی عشرہ غاتیان کمک کننگ ءِ و کمکاری نا دا چرجوئی برجاسلک۔ جائیکا نا سروک شیلگی فروٹا داوخت آپارے کہ ننے پولیو پروگرام و ودکی پروگرام رکھی ٹیکہ غاتا سورُک و ترینزک مہم و پولیو مہم اٹ اسیجائی کوشست آتیا خوشی ءِ۔ کورونا دین انا مون ءِ توننگ تون اوار اوار پولیو پروگرام نا کارکڑد ستاکڑزک، دا چرجوئی ٹی جائیکا پروگرام نا ویکسینیٹرز نا تربیت پولیو لیبارٹری ٹی پی سی آر ٹیسٹ نا آسراتی و ہیلپ لائن 1166 ءِ کاریم اٹ اتنگ ستاکڑزک۔ حکومت پاکستان نا رداٹ 2023نا ایسر اٹ پاکستان ءِ پولیو آن پاک مرسا خننگ اُن۔ فرنٹ لائن ورکرآتا کوشست و حکومت پاکستان نا پولیو نا چٹفنگ اٹ سرکڑدہ ئی اہمیت تخک۔ پاکستان اٹ یونیسیف نا سروک ایڈا گرما داوخت آ پارے کہ پاکستان اینخو سال پولیو نا چٹفنگ اٹ تاریخی سرسہبی دوئی کرینے سال 2020ء ٹی 84 کیس آتا مقابلہ ٹی داسال پولیو نا بیرہ اسہ کیس اس رپورٹ مسنے۔ اومستی پارے کہ آخیری مزل نا دوئی کننگ سخت ءِ، ولے برجا شریداری بشمول حکومت جاپان نا آخیریکو مزل نا خڑک آ دیک۔ جاپان نا حکومت سال 1996ء آن پولیو نا چٹفنگ نا کوشست آتیٹی کمک کننگ ءِ، داتم اسکان حکومت جاپان پولیو چٹفنگ کن یونیسیف نا کمک اٹ 230497 ملین ڈالر ز نا کمک کرینے۔