اسلام آباد۔ 13 دسمبر (اے پی پی) پاکستان اٹ ای کامرس رجسٹرڈ مرچنٹ آتا کچ اٹ تدوک آ اِراسال اٹی 76 درسد ودکی مسنے۔ اسٹیٹ بینک آف پاکستان (ایس بی پی) نا حساب وکتاب نا رداٹ مالی سال 2019-20اٹی ملک اٹی ای کامرس نا رجسٹرڈ پوریاگرآتا کچ 1707 ئس ولے تدوک آ مالی سال 2020-21نا ایسر اسکان پاکستان اٹ ای کامرس نا رجسٹرڈ مرچنٹ آتا کچ 3003 اسکان ودا۔ ہنداوڑ اِراسال اٹی ای کامرس نا رجسٹرڈ پوریاگرآتا کچ اٹ 1296 یعنی 76 درسد نا نمان ودکی ریکارڈ کننگانے۔ ایلو کنڈآ ان سائڈ انٹیلی جنس نا رپورٹ نا رداٹ اینخو سال 2021اٹی آن لائن سیلز اٹی 19.5 درسد ودکی گمانی ءِ وخت اس کہ سال 2019اٹی جہانی کہول آ آن لائن سیلز اٹی 13.9 درسد ودکی مسوسس۔ ہنداوڑ تدوک آ اِراسال اٹی مچ آ دنیا ٹی آن لائن سیلز اٹی 45 درسد ودکی ریکارڈ کننگانے۔ رپورٹ اٹی پاننگانے کہ کوویڈ۔ 19 نا جہانی دین انا سوب آن ای کامرس کمپنی تا کاروبار اٹ نمان ودکی مسنے و ای کامرس نا بشخ اٹ ودکی نا کچ انا چرجوئی برجاسلک۔
