کراچی۔ 10 دسمبر (اے پی پی) وزیراعظم عمران خان جمعہ نادے آ کراچی نا شاری تیکن پوسکن انگا سفری آسراتی تا حامل 35.5 ارب روپئی نا خڑچ انا گرین لائن بس ریپڈ ٹرانزٹ سسٹم ڈٹ انا بناءِ کرے۔ دا ڈٹ بنجائی حکومت نا کنڈآن سندھ انا الس خاص وڑاٹ کراچی والا تیکن اسہ نہادی ءُ ٹیکی اسے ہراڑآن دیکی و نیامی ضلع غاتا 135،000 مسافر آتے ہڑدے پوسکن آ سفری آسراتی تتون سینٹر بزنس ڈسٹرکٹ اسکان رسینگ آسان و رکھ مننگ کیک۔ 21 کلومیٹر مرغن گرین لائن بس ریپڈ ٹرانزٹ سسٹم کوری ڈور آ 22 اسٹیشن، ٹکٹنگ روم، برقی زینہ و سیڑھیک ساڑی ءُ، ہراڑے بجلی نا بے سلنگ آن فراوانی ءِ پک کننگ کن بیک اپ جنریٹر آتا آسراتی ساڑی ءِ۔ گرین لائن بس سروس اٹ نرینہ، نیاڑی و بزرگ آتیکن جتا ءُ درگہ ءُ۔ بس انا ہڑتوم آ کنڈآتیٹی درگہ خلوک ءِ، اولیکو درگہ زالبول آتیکن ، ارٹ میکو خاہوت و مسٹ میکو نرینہ و مسن تیکن جتا کننگانے۔ ہربس اٹ معذور بندغ آتیکن بورڈنگ برج و تولنگ نا خصوصی بست وبند ءِ۔ 150 مسافر آتا گنجائش اتون 18 میٹر مرغنی نا حامل 80 ڈیزل ہائبرڈ و ایئرکنڈیشنڈ بس سروس سرجانی آن میونسپل پارک اسکان 22 کلومیٹر نا فاصلہ ءِطے کیک۔ ہر بس اٹی معلومداری و تشہیر کن ڈیجیٹل سکرینز، سی سی ٹی وی کیمرہ ہم خلنگانے وخت اس کہ بس اسٹیشن آ ساڑی آسراتی تیٹی ایسکلیکٹرز، لفٹ سروس اوار ءِ۔ داکان بیدس مسافر آتا آسراتی کن ٹکٹ وینڈنگ مشین ہم خلنگانے، بس اٹی سیل فون چارجنگ پورٹ انا آسراتی ہم ساڑی ءِ و فائر اینڈ سیفٹی ایکوپمنٹ ہم خلنگانے۔ داڑے دا ہیت ذکر انا قابل ءِ کہ دا ڈٹ ءِ بنجائی وزیر ڈٹ بندی اسد عمر نا خصوصی است خواہی آ بنجائی وزارت ڈٹ بندی، شونداری وخصوصی گام گیج سندھ انفراسٹرکچر ڈویلپمنٹ کمپنی نا کمک اٹ تعمیر کرفینے۔
