اسلام آباد۔ 10 دسمبر (اے پی پی) وزیراعظم عمران خان (اینو جمعہ نادے آ) اسہ دے ئی دورہ غا کراچی آ روانہ مسنے ۔ وزیراعظم آفس نا میڈیا ونگ آن جاری بیان نا رداٹ بنجائی وزیر حوالکاری و شینکاری چوہدری فواد حسین وزیراعظم تون اوار ءِ۔ وزیراعظم کراچی ٹی گرین لائن بس ریپڈ ٹرانزٹ سسٹم (بی آر ٹی ایس) ڈٹ انا بناءِ کیک۔ 35.5 ارب روپئی نا بھلو زر اسے آن پورو مروک آ دا ڈٹ بنجائی حکومت نا کنڈآن سندھ انا الس خاص وڑاٹ کراچی والا تیکن اسہ بھلو ٹیکی اسے۔ گرین لائن بس ریپڈ ٹرانزٹ سسٹم (بی آر ٹی ایس) ڈٹ کراچی نا دیکی و نیامی ضلع غاتا 135،000 مسافر آتے ہڑدے سفر کننگ کن پوسکن انگا سفری آسراتی فراوان کیک، ہراڑآن اوفتا سینٹرل بزنس ڈسٹرکٹ (سی بی ڈی) اسکان رسینگ آسان و رکھ مننگ کیک۔ داڈٹ ءِ بنجائی وزیر ڈٹ بندی اسد عمر نا خاص است خواہی آ بنجائی وزارت ڈٹ بندی، شونداری و خصوصی گام گیج سندھ انفراسٹرکچر ڈویلپمنٹ کمپنی (ایس آئی ڈی سی ایل) نا کمک اٹ جوڑ کرفینے۔ گرین لائن بس ریپڈ ٹرانزٹ سسٹم (بی آر ٹی ایس) ڈٹ اٹی 21 اسٹیشن، ٹکٹنگ روم، برقی زینہ و سیڑھیک اوار ءُ، ہراڑے بجلی نا بے سلنگ آ ن فراوانی ءِ پک کننگ کن بیک اپ جنریٹرز آتا آسراتی ساڑی ءِ۔ وزیراعظم داوخت آ دود آن تران ہم کیک۔ داکان مست وزیراعظم صوبہ نا انتظامی و سیاسی امور آ گورنر ہاؤس اٹ چندی دیوان تا کماشی ءِ کیک۔ وزیراعظم اینگرو پولیمرپلانٹ ایکپینشن نا نقاب کشائی ءِ ہم کیک۔
