اسلام آباد۔ 10 دسمبر (اے پی پی) صدر مملکت ڈاکٹر عارف علوی پنشن نا شفاف بشخنگ کن پنشنرآتا بائیو میٹرک پک کننگ نا نظام نا بناءِ کرینے ہراڑآن 14 لکھ پنشنر آتیٹی ہر تُو 60 ارب روپئی نا زر شفاف وڑاٹ بشخنگ ءِ پک کننگک۔ جمعہ نادے آ اے جی پی آر اٹی پنشنرآتیکن ڈیجیٹل آسراتی نا بنائی دود آن تران کرسا صدر مملکت است جمی ظاہر کرے کہ دا گام آن نئے بیرہ پنشنرآتا ذاتی پک کننگ نا نظام اٹ گچینی بریک بلکن جعلی شناخت نا توننگ ءِ ہم پک کننگ مریک۔ اوپارے کہ دانظام آن نئے بیرہ پنشنر آتا مشکل آتا ازالہ مریک بلکن اوفتا شفاف ڈیٹابیس انا کسر آوار کننگ و گھوسٹ پنشنرآتا چٹفنگ اٹ کمک رسینگک۔ اوپنشنرآتے آسراتی فراوان کننگ و پنشن نا بشخنگ اٹ شفافیت ءِ پک کننگ کن بائیو میٹرک نا پک کننگ ءِ اہم ءُ گام اس گوندا۔ اوپنشنرآتا آسراتی و پنشن نا بشخنگ اٹ شفافیت ءِ پک کننگ کن بائیو میٹرک پک کننگ ءِ اہم گوندا۔ او7 آن 12 درسد نا لگ بھگ بندغ ءِ خن و دروشم نا کمک اٹ پک کننگ نا نظام آ کاریم کننگ نا سلاہ تس، داہموفک ءُ ہرافتا وئی، معذوری، زیات مزوری و ناجوڑی نا سوب آتیا فنگر پرنٹس زیان مریک ہرانا سوب آن اوفتا پک مفک۔ او ڈیٹاو مصنوعی ذہانت ءِ کاریم اٹ اتسا گچین آڈٹ نا نظام آ زور شاغا۔ الس نا فائدہ ٹی ڈیجیٹلائزیشن نا کاریم اٹ اتنگ آ زور شاغسا اوپارے کہ ملک انا شونداری نا سیبو ٹیکنالوجی نا پوسکن آ کچ آتے وخت آ تینا کننگ اٹی ءِ۔ بیرہ ہمو ملک آک شون ہلکر ہرافک ٹیکنالوجی نا پوسکن آ رجحان تے دمدستی تینا کریر و اوفتے تینا خذمت نا فراوانی نا نظام ءِ بشخ کریر۔ اوپارے کہ ڈیجیٹلائزیشن ملک انا زرگزرانی شونداری آ اِرٹ آن مسٹ درسد مثبت اثر شاغک۔ قوم ءِ اونا فائدہ غان معلومدار کننگ اہم ءِ۔ ہنداوڑ او پارے کہ ڈیجیٹل بینکنگ صارف آتے کم آن کم انسانی مداخلت اتون شفاف و مناسب مالی ٹرانزیکشنز نا آسراتی فراوان کیک ولے او مالیاتی ادارہ غاتیا زور ساغا کہ او الس ءِ پدریسہ آگاہی نا کمک اٹ مالیاتی درو انا برخلاف سوگو رکھ فراوان کے۔ اوپارے کہ بروک آ گچین کاری تیٹی الیکٹرانک ووٹنگ مشین و پیشن نا ملک رہینگوک پاکستانی تیکن انٹرنیٹ ووٹنگ الس نا فائدہ ٹی ٹیکنالوجی ءِ کاریم اٹ اتنگ نا کنڈآ اسہ پین اہم ءُ گام اسے۔ ای وی ایم آن وونٹ آتا شفاف و دمدستی گنتی ءِ پک کننگ اٹ کمک رسینگک و دٹی نغڑد نا ہم ہچ ءُ گڑتی اس اف۔ صدر مملکت پنشنرآتا آسراتی کن بائیو میٹرک پک کننگ خذمت آتا بناءِ کننگ آ آڈیٹر جنرل آف پاکستان و نادرا نا سفت ءِ کرے۔ داوخت آ او اے جی پی آر نا اِرا پنشنرآتا بائیو میٹرک پک کننگ نا عمل ءِ ہرا ہرافک آن لائن ویریفیکیشن کن بینک انا بائیو میٹرک ڈیوائس آ تینا فنگر پرنٹ ءِ تخا۔
