اسلام آباد۔ 10 دسمبر (اے پی پی) وزیرخارجہ شاہ محمود قریشی پارینے کہ پارلیمانی جمہوریت نا حیثیت اٹ، پاکستان المی کانودی و انتظامی پنجر، آزاد میڈیا و متحرک سول سوسائٹی اتون، غٹ انسانی حق انا مون آ دننگ و رکھ اکن سنبرینگوک ءِ۔ جمعہ نادے آانسانی حق انا جہانی دے انا وخت آ تینا اسہ کلہو اسے ٹی وزیر داخلہ پارے کہ دادے، پاکستان انسانی حق انا جہانی اعلامیہ ءِ تینا کننگ نا 73 می سال دے ءِ اڈتننگ اٹ جہانی برادری تون ہم کوپہ ءِ۔ دا اعلامیہ ریاست، راج و برادری تیکن بیدس پرخ آن، غٹ انسان تا حق، آجوئی و وقار ءِ مون آ دننگ و رکھ فراوان کننگ کن روشنائی نا مینار ءِ۔ دادے بریبری، انصاف، رواداری، امن و شونداری نا جہانی اسیجائی ہدف آتا دوئی کننگ اٹ پیش رفت نا یات دہانی کرفک۔ داکان پد ہم، دادے دافائدہ غاتے رکھ تخنگ و دا آجوئی و حق آن محروم مخلوق ءِ پین واکدار کننگ کن کوشست آتے اِرا ہنداخکہ پین کننگ نا گرج آ ہم زور شاغک۔ وزیرخارجہ پارے کہ کوویڈ۔ 19 دینی مرض ملک آتے ٹی و اوفتا نیام اٹ نظامی و پنجرجاتی بے بریبری ءِ بے نقاب کرینے۔ ہرانانتیجہ ٹی غیر متناسب اقتصادی بحالی ، ودوک آ وام تا بھاریم و کوویڈ ویکسین نا بشخنگ نا حالیت اٹ جہانی اقتصادی و مالیاتی پنجر اٹ بے بریبری داہیت انا پیدوار شاہدی ءِ۔ وزیرخارجہ پارے کہ بھارت نا 5 اگست 2019 نا غیرکانودی و اسہ کنڈی گام گیج، مقبوضہ جموں و کشمیر نا آبادیاتی پنجر ءِ بدل کننگ کن جوڑ کننگانے، ہرا جہانی کانود بشمول چارمیکو جنیوا کنونشن نا برخلاف ءِ، دا گام گیج آتا مسخت کشمیری تے حق خودارادیت نا تینا حق انا کاریم اٹ اتنگ آن محروم کننگ ءِ۔ دا اسہ کنڈی گام گیج آک کشمیری الس نا بنداوی حق، شناخت و بنداوی آجوئی تیا ظلم و جور ءِ ودفینو۔ بھارتی کوزہ گیر فوج انا کنڈآن مقبوضہ کشمیر اٹی کشمیری تا برخلاف مروک آ انسانی حق انا بھلا خلاف ورزی و انسانیت نا برخلاف ڈوہ تے اقوام متحدہ نا انسانی حق انا ادارہ خاص وڑاٹ انسانی حق انا ہائی کمشنر نا دفتر نا کنڈآن اِرا رپورٹ آتیٹی ہم تالان کننگانے۔ وزیرخارجہ پارے کہ نن مقبوضہ کشمیر اٹی انسانی حق انا بھلا خلاف ورزی تا چٹفنگ کن تینا خواست و بھارت نا ظلم و کوزہ گیری و جور انا برخلاف کشمیری الس نا منصفانہ جہد اٹی اوفتا ہرممکن مخ تفی نا عزم انا ہم درشانیءِ کینہ۔ داکان بیدس پاکستان ملکی آئین و انسانی حق انا جہانی اعلامیہ نا شڑت آتا رداٹ تینا غٹ شاری تا حق و آجوئی نا شرف و رکھ ءِ پین مون آ دننگ نا تینا عزم انا درشانی ءِ ہم کیک۔
