اسلام آباد۔9دسمبر (اے پی پی): مزن وزیر عمران خان ءَ گشتگ کہ دنیا اوگان اُلس ءِ جیڑہ ء ُجنجالاں بہ ماریت، اوگانستان ءَ را انسانی پدمنتگی ءَ چہ رکینگ المی اِنت، بھارت سلاہ ءِ زور ءَ چہ ، زوراکی ءِ کارمرز کنگ ءُ زُلم ءُ ناحقی ءَ چہ کشمیری آنی توار ءَ بند کُت ناکنت، آر ایس ایس ءِ است بوہگءَ بھارت ءَ ڈنی دژمن ءِ ضلورت نااِنت، پیسر ءَ سردیں جنگ ءَ چہ دنیاءَ را باز نقصان بوتگ ، پاکستان نوں ایچ وتیں بلاک ءِ بر جوڑ نابیت، دنیا ءِ تہا بیپاری پائدگ موسمیاتی مٹء ُ بدلیءِ اثرآنا ں گرء ُدار کنگ ءِ ھاترءَ پکاریں گامگیجانی کِشک ءَ اوشت اَنت، مارا پٹء ُ پول ء ُ تھنک ٹینکس ءَ چہ انچیں بیانیہ دیما آرگ لوٹ ایت کہ مئے راج ءِ جارچینی ءَ بہ کنت۔ اے ھیالانی درشانی آئی ء َ پنچ شمبے ءِ روچءَ انسٹی ٹیوٹ آف سٹریٹجک سٹڈیز “یک امن ء ُ ایمنیں ء ُ وشھالیں جنوبی ایشیا” ءِ سرحال ءِ سرءَ کانفرنس ءِ بُنگیجی سیشن ءَ گوں تران کنان ءَ کتگ۔ مزن وزیر ءَخطہ حاس اوگانستان ءِ جاور ھال ءِ ہوالگءَ گشتگ کہ اوگانستان ءِ جاورھال ءِ مارا باز پکر اِنت اودا خانہ جنگی ءِ تُرس بوتگ۔ سویت جنگ ءَ 2 لکھ اوگان شہری بیران بوتگ اَنت۔ پاکستان ءِ سرءَ ہم باہوٹیانی بار ایر کنگ بوتگ۔ آئی ءَ گشتگ کہ پاکستان سرجمیں کوشستءَ کنگءَ اِنت کہ دنیاءَ را حال بہ بنت کہ آ طالبان ءَ را پسند کناں یا ناکناں ، 4 کروڑ اوگان اُلسانی جیڑہ آں بہ ماراں ۔ امریکہ ہم سرپد بہ بیت کہ اوگانستان ءِ مال ء ُ مڈی ءَ را جمینگ ء ُ آئیءِ معیشت ءَ را دارگ ءَ انسانی پدمنتگی ودی بہ بیت گڑا ایشی ءِ نقصان درستاناں بیت ء ُ پاکستان درستاں چہ گیش آماچ بیت۔ ایران ءَ ہم اے وہدءَ باہوٹیانی مزنیں جیڑہ اَست۔ اوگانستان ءِ اُلس 40 سالاں چہ بازیں جیڑہ ء ُ جنجالانی آماچ اَنت۔ پاکستان آیانی جیڑہء ُجنجالاناں کم کنگ ءَ وتی کردءَ پیلو کنت۔ مزن وزیر ءَ گشتگ کہ سی پیک پہ پاکستان ءِ ھاترءَ یک مزنیں موہ اِت۔ ایشی ءَ چہ ما پائدگ چست کنگ ءَ اَنت۔ آئی ءَ گشتگ کہ ایران ء ُ سعودی عرب ءِ نیام ءَ جیڑہ ءَ را گیش ء ُ گیوار کنگ ءَ ہم پاکستان ءَ وتی سرجمیں کرد پیلو کتگ کہ ایشی ءَ را ایندگہ ملک آں ساڑاتگ۔ مزن وزیر ءَ گشتگ کہ امریکہ ء ُ چین ءِ نیام ءَ سردیں جنگءِ ہوالگءَ دوری گیش بوہان اَنت ء ُ مئے کوشت اِنت کہ اے دوریاں کم بہ کن اَنت۔ آئی ءَ گشتگ کہ بھارت ءَ 50 تا 60 کروڑ مردماناں دومی درجگ ءِ شہری لیکگ بوہگ ءَ اِنت۔ آئی ءَ گشتگ کہ بھارت ءَ آر ایس ایس ءِ لیکہ محکم نااِنت، آر ایس ایس ءِ است بوہگءَ بھارت ءَ دگہ دنی دژمن ءِ ضلور ت نااِنت، آر ایس ایس ءَ بھارت ءِ تہا بھرء ُبانگ ءِ لیکہ دیماآؤرتگ۔ 2013 ءَ خیبر پختونخوا ءَ بلین ٹری سونامی منصوبہ بندات کنگ بوتگ۔ ہمالیہ ءِ گلیشیئرز قراقرم ءِ گلیشیئرزءَ چہ گشادی ءِ گوما آپ بوہگءَ اِنت۔ آئی ءَ گشتگ کہ مئے اِے واہشت اِنت کہ ما بھارتی حکومت ءِ گوما منطق ءِ گوما گپ کناں ء ُ وتی جیڑہ ءِ جیڑھ ء ُ جنجالاناں گیشءُ گیوار کناں۔ مزن وزیر ءَ گشتگ کہ مئے درستاں مستریں جیڑہ کشمیرءِ جیڑہ اِنت۔ کشمیر ءِ جیڑہ گوں سلاہ آں چہ نا سول ءُ تران ءَ گوں گیش ء ُ گیوار بیت۔ آئی ءَ گشتگ کہ ما اُمیت کناں کہ بھارت ءَ یک انچیں حکومتے کیئت کہ گوں آئی ءَ ننداَنت ء ُ سولء ُ تران ءَ چہ کشمیرءِ جیڑہ ءَ گیشء ُ گیوار کناں۔ آئی ءَ گشتگ کہ مارا اے وہدءَ پٹء ُ پول ء ُ تھنگ ٹینکس ءِ باز ضلورت اِنت۔ مئے یونیورسٹی آنی تہ ءَ پٹء ُ پول ءِ سرءَ گیشاں چہ گیش کار کنگ لوٹ ایت۔ مزن وزیر ءَ گشتگ کہ ملک ءَ انسٹی ٹیوٹ آف سٹریٹجک سٹڈیز ءِ وڑءِ تھنک ٹینکس ءِ باز ضلورت اِنت، 1960 ءِ زمانگ ءَ یک مزنیں منصوبہ بندی کمیشن ءِ ردءَ ملک ءَ درستاں چہ گیش اقتصادی دیمروئی بوتگ ء ُ ملائیشیا وڑیں ملک پاکستان ءَ را وتی رول ماڈل لیک اِتگ بوتگ بلے ایشی ءَ پد اے ہوالگءَ مئے زانت کاری کم بوہان بوتگ۔ مزن وزیر ءَ گشتگ کہ نائن الیون ءَ پد چہ امریکہ ءَ تھنگ ٹینکس ءَ پاکستان ءَ را ایر جنگ بندات کتگ وہدے کہ نا آ چہ راستی سرپد اَنت ء ُنا مئے راج دپتر ء ُ دودء ُ ربیدگ ءَ چہ سرپد اَنت۔ آ کسے ءَ را ناشرکار ء ُ کسے ءَ را بنیات پرست لیک اَنت ء ُ کدی اسلامی بمب ءِ گپ ءَ کناں ۔ انوگیں حکومت ءَ رحمت للعالمین ﷺاتھارٹی جوڑ کتگ کہ آئی ءِ ردءَ اسلام ءِ ھاترءَ باز جوانیں کار بوہگءَ اِنت۔ ایشی ءَ چہ آبید آئی ءَ گشتگ کہ جنگءُ جدل ءَ چہ جیڑہء ُ جنجال گیش ء ُ گیوار کنگ ءِ وائشت داروکیں مردم وتی سلاہ آنی سوب ءَ چہ تکبر کناں ۔ آ انسانیت ءِ بابت ءَ ناجیڑہ اَنت۔ اوگانستان ء ُ مئے جاورھال درستانی دیما اَنت۔ اوگانستان ءَ جنگ ءِ سوب ءَ چہ جیڑہ ء ُ جنجال درستانی دیم اَنت، تاں گڑی ءَ مئے کوشست اے بہ بیت کہ جیڑہء ُجنجال چہ گپ ء ُتران ءَ گیش ء ُ گیوار بہ بنت۔ بُنگیجی سیشن ءَ چہ دری کا رانی وزیر شاہ محمود قریش ءَ ہم تران کتگ۔
