کوئٹہ۔ 09 دسمبر (اے پی پی) گورنر بلوچستان سید ظہور احمد آغا پارینے کہ وڈی خوری نا چٹفنگ خوداحتسابی آن بیدس ممکن اف، ہر انسان نا ضمیر اودے خراب انگا کاریم آن تورک، نن غٹ آن مست تینا احتساب ءِ تینٹ کین۔ داخیال آتا درشانی ءِ او پنچ شنبے نادے آ انسداد وڈی خوری نا جہانی دے انا وخت آ گورنر ہاؤس اٹی اڈ ہلوک دود آن بحیثیت مہمان خاص تران کرسا کرے۔ دود اٹی ڈائریکٹر جنرل نیب بلوچستان فرمان اللہ خان، چیف سیکرٹری مطہر نیاز رانا، انسپکٹر جنرل پولیس محمد طاہر رائے ، مسکوہی نگران وزیرخورشید روشن بروچہ تون اوار چندی جامعہ غاتا وائس چانسلرز، سرکاری آفیسر، میڈیا نا نمائندہ و ایلوفک ہم بشخ ہلکر۔ گورنر پارے کہ وڈی خوری آن نجات نا دے انا وخت آ دود انا اڈتننگ ستاکڑزوک ءُ ہیت اسے۔ میڈیا نیزگار آتا توار ءِ صاحب اقتدار آتا ایوان اسکان سرکیک۔ اوپارے کہ وڈی خوری کروک آ احکام خداوندی و حقو ق العباد ءِ فراموش کیک، حقوق العباد غصب کروک آتا معافی ممکن اف، وڈی خوری آن زیات ہچ ءُ گندہ ءُ حرکت اس مننگ کپک، وڈی خوری ءِ تینا مزل تکوک آک غلطی آٹو۔ اونا پاننگ ئس کہ گچین عہدہ والاک اصلاح کیر تو ماتحت عملہ ہم تینا اصلاح ءِ کیک ، خوداحتسابی نا عمل انسان ءِ فیصلہ ساز قوت ایتک۔ راج اٹ شونداری کن ندامت نا احساس المی ءِ۔ سید ظہور احمد آغا پارے کہ راج اٹ جوان انگا مخلوق ءِ مون آ اتنگ نا قول کروئی مریک، وڈی خوری ءِ چٹفنگ بیرہ نیب انا کاریم اف بلکن نن غٹ داٹی تینا کڑد ءِ ادا کین، اگہ نن انفرادی وڑاٹ طے کین کہ غلط کاریم کپنہ تو راج گچین مریک۔
