اسلام آباد۔ 09 دسمبر (اے پی پی) سپریم کورٹ کٹیا غان زیات میرات آتا کیس اٹ اسپیکر سندھ اسمبلی و پیپلزپارٹی نا راہشون آغا سراج درانی نا ضمانت نا بابت دائر درخواست آ سماعت ءِ جنوری 2022ء نا ارٹ میکو ہفتہ اسکان پد بٹے۔ عدالت عظمیٰ کٹیا غان زیات میرات آتا کیس اٹ آغا سراج درانی تون شریک دوبہ دار آتا عبوری ضمانت اٹ بروک آسماعت اسکان ودکی کرسا نیب ورندی نا کاپی اس آغاسراج درانی نا وکیل ءِ تننگ نا پارت کرے۔ پنچ شنبے نادے آ جسٹس عمر عطابندیال نا کماشی ٹی مسہ باسکی بنچ کٹیا غان زیات میرات کیس اٹی اسپیکر سندھ اسمبلی آغا سراج درانی نا ضمانت نا بابت دائر درخواست آسماعت کرے۔ سماعت اٹی آغا سراج درانی نا وکیل دلیل ترسا موقف تینا کرے کہ عدالتی پرمان نا رداٹ کنا موکل نیب ءِ دزگیری تسنے، احتسا ب عدالت آغا سراج درانی نا جوڈیشل ریمانڈ کرینے، آغا سراج درانی نا میراتی جائیداد نا سہی کساس ءِ خلنگتنے۔ داوخت آ جسٹس عمر عطابندیال ریمارکس تس کہ ولدا نن نیب ءِ نوٹس جاری کرسا ورندی بٹنگنہ۔ اسپیشل پراسیکیوٹر نیب ستار اعوان داوخت آ عدالت ءِ پارے کہ قومی احتساب بیورو نا کنڈآن ورندی جمع کرفنگانے۔ سپریم کورٹ نیب ورندی نا کاپی اس آغا سراج درانی نا وکیل ءِ فراوان کننگ نا پارت کرسا معاملہ غا سماعت ءِ جنوری 2022ء نا ارٹ میکو ہفتہ اسکان پدبٹسا آغا سراج درانی تون شریک دوبہ دار آتا عبوری ضمانت اٹ بروک آ سماعت اسکان ودکی کرے۔
