پشاور۔8دسمبر (اے پی پی): مزن وزیر عمران خان ءَ گوشت کہ ملک ءَ گران بھائیءَ گوں گر ءُ چیل بوھگ ءِ واستہ احساس راشن پروگرام بندات کنگ بوتگ ایشی ءِ چیر دستی ءَ آرت، روگن ءُ ڈال 30 درسد کم نیاد ءَ دیگ بیت، یک دگہ پروگرام ءِ بندات بیت ایشی ءِ چیر دستی ءَ 20 لکھ گریبیں ءُ کمو کٹ کنوکیں ھاندان آناں بے سُت ءَ وام دیگ بیت، ھمک ھاندان ءَ یک مردمے ءَ را ازم کار ءُ بلدکار جوڑ کناں، سرجمیں پنجاپ ءَ جنوری ءَ ہیلتھ انشورنس دیگ ءَ آں، بلوچستان ءِ سر وزیر ءَ ھم ہیلتھ انشورنس دیگ ءِ پیسلہ کتگ۔ اے ھیالانی درشانی آئی ءَ چار شمبے ءَ گورنر گس پشاور ءَ احساس کفالت ءَ پروگرام ءِ چیر دستی ءَ چیک بھر ءُ بانگ کنگءِ مراگش ءَ گشتانک دیان ءَ کت۔ اے موہ ءِ سر ءَ بنجاھی وزیر اھوالکاری ءُ شنگ کاری چوہدری فواد حسین، مزن وزیر ءِ ھاسیں کمکار برائے گریبی ءِ گر ءُ دار کنوک، ڈاکٹر ثانیہ نشتر، گورنر خیبر پختوا شاہ فرمان، سر وزیر محمود خان ءُ ایندگر کلانہ ایں کارندہ ساڑی اتنت۔ مزن وزیر ءَ گوشت کہ 25 سال پیسر تحریک انصاف بندات کتگ گڈا مئے لیکہ پراھ ءُ شاھیگان بوتگ کہ پاکستان ءَ را اسلامی گہبودی ریاست ءِ جوڑ کنگ انت۔ آئی ءَ گوشت کہ احساس راشن ریایت پروگرام ءِ بنگیج ءَ چہ شہری آناں آرت ، روگن، ٹیل ءُ ڈل ءِ بھا زورگ ءِ واستہ 30 درسد ریایت دیگ بیت۔ احساس راشن پروگرام ءِ کلی کساس 120 ارب کلدار انت۔ پروگرام ءِ چیر دستی ءَ 2 کروڑ ھانداسن ءُ کساس 13 کروڑ مردم سیت مند بنت۔ ایش ملک ءِ کلی آباتی ءِ کساس 53 درسد انت۔ ھمک ماہ 50 ہزار ءَ چہ کم آمدنی والائیں ھاندان اے پروگرام ءَ چہ سیت چست کت کناں۔ آئی ءَ گوشت کہ آئندگ 10 سال ءَ 10 ڈیم جوڑ کنگ بیت۔ مئے ملک باز ترندی ءَ گوں دیمروئی کنگ ءَ انت۔ مزن وزیر ءَ گوشت کہ اے وھد ءَ مئے کرا پٹرول ءُ ڈیزل ءِ نیاد دگنیا ءِ گیشتریں ملک آنی مقابلہ ءَ کم انت۔
