اسلام آباد۔ 08 دسمبر (اے پی پی) وزیراعظم عمران خان (اینو) چارشنبے نادے آ پشاور نااسہ دے ئی دورہ ءِ کیک۔ وزیراعظم آفس نا میڈیا ونگ آن جاری بیان نا رداٹ وزیراعظم پشاور اٹی وزیراعلیٰ، گورنر خیبرپختونخوا و سیاسی سرکڑدہ غاتون اوڑدہی کیک۔ داکان بیدس وزیر اعظم سرسہب پاکستان پروگرام نا رداٹ مائیکرو ہیلتھ انشورنس پروگرام نا بناءِ کیک۔ پروگرام نا رداٹ خیبرپختونخوا نا 75 لکھ خاہوت ءِ 10 لکھ روپئی سالانہ مفت جان جوڑی نا آسراتی فراوان کننگ انگ ءِ۔ وزیراعظم پشاور اٹی احساس راشن رعایت پروگرام نا رجسٹریشن نا بابت دود اٹی ہم بشخ ہلیک ہراڑے نئے بیرہ خصوصی کمکار تخفیف نیزگاری و راجی رکھ سینیٹر ڈاکٹر ثانیہ نشتر وزیراعظم ءِ پروگرام آ سرجمی اٹ حوال ایتک بلکن وزیراعظم ٹریڈ رایسوسی ایشن و کریانہ الائنس تون اوڑدہی ہم کیک۔ احساس راشن رعایت پروگرام جم وڑاٹ زرگزرانی وڑاٹ نزور تپہ غاتیان تعلق تخوک آ کم و ود 2 کروڑ خاہوت یعنی 13 کروڑ مخلوق ءِ المی آ گڑاتا ہلنگ اٹ رعایت فراوان کیک۔ داکن بیدس وزیراعظم خیبرپختونخوا حکومت نا جامعہ مسیت آتا آئمہ کرام نا مالی کمکاری نا پروگرام نا رداٹ چیک ہم بشخک۔ داوخت آ وزیراعظم دود آن تران ہم کیک۔
