اسلام آباد۔ 08 دسمبر (اے پی پی) بنجائی وزیر داخلہ شیخ رشید احمد پارینے کہ ملک ءِ بدنام کروک آ تابرخلاف سخت گام گیج کننگک اگہ نواز شریف وطن آ پدی بننگ خواہک تو اودے 24 گھنٹہ ٹی غٹ درکار دستاویز آتے اُراٹی فراوان کینہ، ای پاسپورٹ نا بناءِ کننگ انگ ءِ، 191 ملک آتے آن لائن پاسپورٹ نا آسراتی تننگ اُن، پی ڈی ایم 23 نا جاگہ غا 30 مارچ آ برانز کے۔ داخیال آتا درشانی ءِ او چارشنبے نادے آ ڈائریکٹوریٹ جنرل آف امیگریشن اینڈ پاسپورٹس اٹ چندی پوسکن آ گام گیج آتا بنانا وخت آ اڈہلوک آ دود آن تران کرسا کرے۔ بنجائی وزیر داخلہ پارے کہ کنا کوشست ءِ کہ 100 دے اٹی ای پاسپورٹ پاکستان اٹ بناکے و بروک آ سال انا بناآ ای پاسپورٹ نا آسراتی ملنگ کے، شہریت نا منسوخی و ایمرجنسی سفری دستاویز آتا آن لائن آسراتی ہم فراوان کننگ اُن۔ ای پاسپورٹ نا بابت اڑاند ءِ مر کننگانے، ڈی جی ایف آئی اے ءِ پارت کرینن کہ ملک اٹی منی لانڈرنگ و ڈالر تنکی ودی کروک آتا برخلاف کارروائی کننگے پاکستان اٹ ہراسٹ کہ غریب آتا دتر ءِ پوشک اوفتا برخلاف کارروائی کینہ، ملک انا بدنامی نا سوب جوڑ مروک آتیٹی دوشاغنگک۔ رانا شمیم نا پن پی این آئی ایل اٹ شاغانن و اونا پن ءِ ای سی ایل اٹ شاغنگ نا سفارش کرینن، ہراڑکن دیوان مریک۔ وزیرداخلہ پارے کہ مخلوق ءِ 24 گھنٹہ ٹی پاسپورٹ ملنگ ءِ اگہ نواز شریف ہم پدی بننگ خواہک و اودے ہم پاسپورٹ درکارءِ تو اودے ہم 24 گھنٹہ ٹی غٹ درکار دستاویز اونااُراغا سرکننگ کینہ ولے او بفک۔ وزیرداخلہ شیخ رشید پارے کہ پی ڈی ایم 23 نا جاگہ غا 30 مارچ آ برانز کے انتئے کہ 23 مارچ انا تیاری و پریڈ نا بابت جی ٹی روڈ آ ہن و برمریک، ای خواپرہ کہ دا بابت غاو اس ودی مرے، پی ڈی ایم کمپنی نا مشہوری کن 4 تُو انا وخت تسنے، اپوزیشن سہی وڑاٹ تحریک چلیفنگ نا گچینی ءِ کننگ کتو ہراڑآن حکومت ءِ ہچ ءُ خلیس اس اف۔ اوپارے کہ مچ آ دنیا ٹی اوورسیز پاکستانی تا کچ 1 کروڑ ءِ، سمندر پار پاکستانی تے زیات آن زیات آسراتی ایتنہ، 191 ملک آتیٹی آن لائن پاسپورٹ نا آسراتی تننگ اُن۔ اوپارے کہ مچ آ دنیا ءِ اوغانستان اٹی انسانی تنکی و ہموڑے بین نا ویل آن آگاہی ءِ۔ اوپارے کہ 14 دسمبر اسکان او تینا وزارت، ایف آئی اے، نادرا پاسپورٹ و نیکٹا نا کارکڑد رپورٹ ءِ پیش کیک۔ اوپارے کہ نیشنل ایکشن پلان آ چکار کننگ اُن و نیشنل ایکشن پلان نا بابت قوم ءِ معلومدار تخنہ۔ وزیرداخلہ پارے کہ بھلو وخت اسے آن پیشن نا ملک اڈ کروک آ آفیسر آتے پدی بٹنگ انگک، اوفتا جاگہ غا پوسکن ءُ آفیسر گدریفینہ، ہرا آفیسر آک پیشن نا ملک دہ دہ سال گدریفیر اوفتے بدل کننگ اُن۔ اسہ سوج اسے نا ورندی ٹی اوپارے کہ چمن، طورخم آ گچین وڑاٹ آمدورفت مننگ ءِ۔ اسہ پین سوج اسے نا ورندی ٹی اوپارے کہ ہرافک اِرا ارا پاسپورٹ و شناختی کارڈ تخانو اوفتے مہلت تسونن اوکان پد اوفتا برخلاف کارروائی کینہ۔ اسہ پین سوج اسے نا ورندی ٹی اوپارے کہ رولز انا رداٹ اسہ آفیسر اس ہم ایف آئی اے ٹی اسہ سیٹ آ 3 سال آن زیات رہینگ انگ کپک، اسلام آباد پولیس اٹ بھرتی تا عمل زوت بناکیک 2 ہزار پولیس کارندہ میرٹ آ بھرتی کینہ۔
