برسلز۔ 08 دسمبر (اے پی پی) وزیرخارجہ مخدوم شاہ محمود قریشی پارینے کہ سیالکوٹ نا واقعہ است ہسون ، ہرانا ہچ ءُ اخلاقی ، انسانی جواز اس اف ، ننا آئین و کانود نا رداٹ اقلیت آتے رکھ دوئی ءِ، دین ہم اقلیت آتا رکھ انا رغامک، اوغانستان اٹی حالیت آک کشیدہ مسر تو اونا مضمرآک دوررس مریرہ، اوورسیز پاکستانی ننا میرات ءُ، برسلز اٹی ، دورہ بیلجیئم نا بابت میڈیا نمائندہ غاتون گپ وتران کرسا وزیرخارجہ پارے کہ بیلجیئم نا وزیر خارجہ اسے تون دہ سال انا وقفہ غان پد ہڑتوم آ کنڈآتا اوڑدہی مس۔ نن ہڑتوم آ کنڈآتا واپار، زرکاری، سائنسی ، تعلیمی و کشاری بشخ اٹ کمکاری ءِ مون آ دننگ تون اوار تین پہ تینی است خواہی نا امور آ گپ وتران کرین۔ نیٹو ہیڈکوارٹرز اٹی سیکرٹری جنرل جینز اسٹولٹن برگ اتون اوڑدہی مس، نن دہشت گردی نا برخلاف جنگ اٹ اسہ ایلو تون کمک کرینن و ننا است خواہی ءِ دا کمکاری آخبت ہم برجاسلے۔ ای سویلی ایشیاٹی امن ءِ مون تروک خطرہ غاتیان اودے معلومدار کریٹ۔ ای اودے پاریٹ کہ اوغانستان نا حالیت آتا مون ءِ توننگ غٹ انا فائدہ ٹی ءِ۔ اوپارے کہ بروک آ سال پاکستان و یورپی یونین نا 60 سال پورو مننگ آ نن اسلام آباد اٹی کانفرنس اس اڈ ایتنہ۔ وزیرخارجہ پارے کہ ای اونا مون آ ہمو پبی گام گیج آتے تخاٹ ہرا پاکستان دہشت گردی، منی لانڈرنگ نا برخلاف ہرفے۔ اوپارے کہ سیالکوٹ نا واقعہ بھاز است ہسونی نا سوب ءِ، ہرانا ہچ ءُ اخلاقی، انسانی جواز اس اف، داواقعہ غا پاکستان ءِ شرمندگی ہرفوئی تما۔ داوخت اسکان 132 نا خڑک دزگیری مسنے 26 دوبہ دار ہرافتیا شک ظاہر کننگ انگ ءِ اوفتے ہم دزگیر کننگانے۔ ننا آئین و کانود نا رداٹ اقلیت آتے رکھ دوئی ءِ، دین ہم اقلیت آتا رکھ انا رغامک۔ وزیرخارجہ پارے کہ ہراڑے ہندوستان اٹی اقلیت آتا زند ءِ ژند کننگا، ہموعڑے پاکستان ہندوستان تون اوار مچ آ دنیا ٹی سکھ آتیکن کرتا رپور راہداری ءِ ملا۔ پاکستان اٹ دیوالی و کرسمس نا تہوار تے پورو مذہبی آجوئی اتون اڈتننگک۔ ہراڑے اقلیت آتا رکھ حکومت نا زمواری مریک تو ہموڑے میڈیا نا ہم بھاز اہم زمواری ءِ۔ اوپارے کہ ملک عدنان ہم دا مچی ٹی ساڑی ئسک ہرانا کڑدانا وزیراعظم عمران خان ستاءِ کرے و اوڑکن تمغہ شجاعت نا پڑو کرے۔ وزیرخارجہ شاہ محمود قریشی پارے کہ داوخت آ ننا مسخت اوغانستان ءِ مون آ بروک اقتصادی و انسانی تنکی آن بچفنگ ءِ ، ہنداکلہو ءِ ای اینو تسونٹ کہ اگہ اوغانستان اٹ حالیت آک کشیدہ مسر تو اونا مضمرآک دورس مریرہ۔ اوپارے کہ اوورسیز پاکستانی ننا میرات ءُ اوفک غیر انا دیار اٹ خواری اٹ تینکن شرف اس کٹانو و اوفک 30 ارب ڈالر نا ترسیلات زر پاکستان آ گدریفیر۔ اسہ سوج اسے نا ورندی ءِ ترسا وزیرخارجہ پارے کہ اشرف غنی آن پد ہراتم اوغانستان اٹی طالبان تا عبوری حکومت جوڑ مس تو ہندوستان ننے زمورا گودنگ کن ’’سینکشن پاکستان‘‘ کمپین اس چلیفے ولے اودے بے سہبی مس ۔
