اسلام آباد۔ 08 دسمبر (اے پی پی) ڈپٹی اسپیکر قومی اسمبلی قاسم خان سوری نا کماشی ٹی 10 باسکی پارلیمانی ڈل اسلامی ملک تنظیم نا پارلیمانی یونین نا 16 می کانفرنس اٹ بشخ ہلنگ کن ترکی نا دورہ غا روانہ مسنے۔ داکانفرنس 9 و 10 دسمبر 2021آ ترکی نا شار استنبول اٹ مننگ ءِ۔ کانفرنس’’اسلامی نظریات !فلسطین، ہجرت و اوغانستان‘‘ نا سرحال آ مننگ ءِ۔ کانفرنس اٹ اسلامی ملک آتا پارلیمان تا اسپیکرز و پریذائڈنگ آفیسر آک پارلیمانی ڈل اتون اوار بشخ ہلنگ ءُ۔ پاکستان نا پارلیمانی ڈل ترکی نا گرینڈ نیشنل اسمبلی نا اسپیکر نا خصوصی سلہ غا کانفرنس اٹ بشخ ہلنگ ءِ۔ ڈل کانفرنس اٹ بشخ ہلنگ آن بیدس ترکی ٹی تینا اڈ کننگ نا وخت آ ترکی نا پارلیمانی کماش و ایلو برادر اسلامی ملک آتا کانفرنس اٹ بشخ ہلنگ کن بروک آ پارلیمانی ڈل آتون اوڑدہی کیک۔ ڈل اٹ ڈپٹی اسپیکر قاسم خان سوری آن بیدس قومی اسمبلی نا باسک رانا تنویر حسین، رانا محمد قاسم نون، محمد اسرار ترین، گل ظفرخان، اسلم خان، سلیم الرحمان، مخدوم سید سمیع الحسن گیلانی، علی خان جدون و عبدالشکور ئسک اوار ءُ۔
