برسلز۔ 08 دسمبر (اے پی پی) وزیرخارجہ مخدوم شاہ محمود قریشی پارینے کہ پاکستان۔ بیلجیم و پاکستان۔ یورپی یونین شریداری ءِ پین سوگو کننگ نا گرج ءِ، پاکستان جی ایس پی پلس نا بابت اقوام متحدہ نا 27 کنونشن آتیا پورو عملدرآمد کن سنبرینگوک ءِ۔ اوغانستان ءِ انسانی تنکی آن کشنگ کن جہانی کمک بھاز المی ءِ۔ داہیت آتے او چارشنبے نادے آ برسلز اٹی بیلجیئم نا پارلیمنٹ آن تعلق تخوک آ پارلیمنٹ نا باسک و یورپی پارلیمنٹ نا باسک آتا ڈل اتون اوڑدہی ٹی پارے۔ اوڑدہی ٹی پاکستان نا بیلجیم و یورپی یونین تون ہڑتوم آ کنڈآتا تعلقداری، اہم علاقائی و جہانی امور آ پیش رفت تون اوار تین پہ تینی است خواہی نا باندات آ گپ وتران مس۔ وزیرخارجہ پارلیمنٹ نا باسک آتے یورپی یونین و اونا غٹ باسک ملک آتون پاکستان نا خوشگوار و دوستانہ تعلقداری تا بارواٹ معلومدار کرسا پارے کہ پاکستان و یورپی یونین جون 2019اٹی اسٹریٹجک انگیجمنٹ پلان (ایس ای پی) آ دستخط کرے، ہرانا نتیجہ ٹی ہڑتوم آ کنڈآتا کمکاری ءِ پین سوگو کننگ اٹ کمک رسینگا۔ پاکستان و یورپی یونین نا نیام اٹ ہندن ءُ میکانزم و ’’ڈائیلاگ فریم ورک ‘‘ ارے ہرافتا کمک اٹ تین پہ تینی است خواہی نا غٹ امور آ سرجم گپ وتران کننگک۔ شاہ محمود قریشی پارے کہ زرکاری ، واپاری و اقتصادی کمکاری، یورپی یونین و بیلجیم تون پاکستان نا کثیر الجہتی تعلقداری نا اسہ اہم ءُ جزاسے۔ جی ایس پی پلس اسیجائی وڑاٹ ہندن ءُ منفعت بخش ءُ گام اس مسنے ہراپاکستان و یورپی یونین نا تین پہ تینی واپار ءِ ودفنگ اٹ اہم ءُ کڑد اس ادا کرینے۔ پاکستان جی ایس پی پلس نا بابت اقوام متحدہ نا 27 کنونشن آتیا پورو عملدرآمد کن سنبرینگوک ءِ۔ اوپارے کہ ہڑتوم آ کنڈآتا کمکاری نا پوسکن آ وارخواہی تا فراوانی ٹی پارلیمان نا گچین کڑد انا ذکر ءِ کرسا ، وزیرخارجہ پاکستان۔ بیلجیم و پاکستان۔ یورپی یونین شریداری ءِ پین سوگو کننگ نا گرج آ زور شاغا۔ وزیرخارجہ ڈل انا باسک آتے 15 اگست آن پد اوغانستان آن درملکی باتی، سفارتکار، جہانی ادارہ غاتا عملہ و میڈیا نمائندہ غاتا رکھ کشنگ اٹ پاکستان نا کلیدی کڑد انا بارواٹ معلومدار کرے و پارے کہ خڑکی ہمسایہ مننگ نا ناطہ پاکستان اوغانستان اٹ زرگزران نا بحالی و دیرپا امن و سوگوی نا خواہندار ءِ۔
