اسلام آباد۔ 08 دسمبر (اے پی پی) بنجائی وزیر حوالکاری و شینکاری چوہدری فواد حسین پارینے کہ اوغانستان اٹی انسانی المیہ ہر ہنوک آ دے اتون ودنگ ءِ، یخ موسم اٹ اوغانستان نا مخلوق بدترین انسانی تنکی نا گواچی ءُ، 19 دسمبر آ او آئی سی وزراء خارجہ کانفرنس اٹ اوغانستان اٹی انسانی المیہ نا حالیت آتیا چکار کننگک، ننا کوشست ءِ کہ سعودی عرب تون اوار ایلو ایلم ملک آتون اواری اٹ ہندن ءُ میکنزم اس ٹہیفنگے ہراڑآن اوغانستان نا مخلوق نا کمک ءِ کننگ مرے۔ داخیال آتا درشانی ءِ او سعودی سفارت خانہ نا کنڈآن اڈ ہلوک دود آن تران کرسا کرے۔ بنجائی وزیر حوالکاری پارے کہ پاکستان اوغانستان نا ہرممکن کمک ءِ کننگ ءِ، نن اِرالکھ 50 ہزار میٹرک ٹن خولم اوغانستان ءِ تننگ اُن، پاکستان اوغانستان آن درآمد کروک آ 40 گڑاتیا ڈیوٹی ءِ چٹفینے، داگام آن اوغانستان نا کاروباری بندغ آتے تینا نت تیا سلنگ اٹ کمک رسینگک۔ اوپارے کہ او آئی سی وزراء خارجہ دیوان بنداوی وڑاٹ غیر سیاسی دیوان اس مریک ہراٹی بیرہ اوغانستان نا انسانی ہمدردی نا بنداو آ کمک آ چکار کننگک۔ چوہدری فواد حسین پارے کہ ننا است خواہی ءِ کہ دنیااوغانستان نا کمک کن اواری اٹ تولے، اوغانستان اٹی ودی مروک آ تنکی شدت اختیار کننگ کیک۔ اوپارے کہ ’’دی اکانومسٹ‘‘ تدوک آ تُو تینا رپورٹ اٹ اوغانستان اٹی انسانی المیہ نا ذکر ءِ کرے ہرا یمن، شام و عراق آن بھلن مننگ کیک، داوڑنا حالیت آتیٹی نن اوغانستان نا الس نا کمک آ بایدے چکار تخن۔ اوپارے کہ نن سیاست آ نن ولدا ہم ہیت کننگ کینہ ولے اوغانستان اٹی ودی مروک آ انسانی المیہ غا ہیت کننگ اٹ ہرے کننگ کپنہ۔ چوہدری فواد حسین پارے کہ وزیراعظم عمران خان مدام اوغانستان اٹی امن نا ہیت ءِ کرینے، ننا حکومت اوغانستان اٹی امن کن کوشست کننگ ءِ۔ اوپارے کہ او آئی سی وزراء خارجہ کانفرنس 1980 ء آن پد پاکستان نا غٹ آن بھلا خارجہ امور نا ایونٹ مریک ہراٹی 27 ملک آتا وزیرخارجہ غاک بشخ ہلیرہ وخت اس کہ 84 ملک آتا نمائندگی مریک۔ چوہدری فواد حسین پارے کہ سعودی عرب تون ننا برادرانہ تعلقداری پاکستان نا جوڑ مننگ مست جوڑ ءِ، ہراتم سعودی عرب نا شاہ عبدالعزیز 1946ء ٹی کراچی آ بس تو آل انڈیا مسلم لیگ نا سرکڑدہ غاک اودے بخیر کریر ہراٹی ایماندار ایم اے ایچ اصفہانی ہم اوار ئسک۔
