اسلام آباد۔ 07 دسمبر (اے پی پی) وزیرخارجہ شاہ محمود قریشی پارینے کہ پاکستان بیلجیئم تون ہڑتوم آ کنڈآتا شریداری ءِ پین سوگو کننگ و سیاسی ، اقتصادی، واپاری ، تعلیمی ، سائنسی و کثیر الجہتی بشخ آتیٹی کمکاری ءِ ودفنگ نا خواہندار ءِ، اوغانستان اٹی مروک آ بروک آ انسانی تنکی تون مون تننگ، مہاجر آتا ہن و بر نا ممکنہ خطرہ ءِ توننگ و اوغانستان ءِ اسہ وار ولدا دہشت گرد آتا پناہ گاہ جوڑ مننگ آن رکھ تخنگ کن جہانی برادری نا کمک المی ءِ۔ دفترخارجہ نا رداٹ داہیت ءِ او سے شنبے نادے آ برسلز اٹی بیلجیئم نا نائب وزیراعظم و وزیرخارجہ صوفی ولمس تون اوڑدہی ٹی پارے۔ گپ وتران اٹی پاکستان و بیلجیئم نا نیام اٹ ہڑتوم آ کنڈآتا تعلقداری نا غٹ پلو آتا جاچ ءِ ہلنگا، وزیرخارجہ داہیت آ زور شاغا کہ پاکستان بیلجیئم ءِ اسہ خڑک ءُ دوست و اسہ اہم واپاری شریداری اسے نا وڑاٹ قدر انا نظراٹ ہرک۔ وزیرخارجہ پاکستان و بیلجیئم نا نیام اٹ ہڑتوم آ کنڈآتا واپار اٹی خاطرخواہ ودکی و تین پہ تینی است خواہی نا بشخ آتیٹی ودوک آ ہڑتوم آ کنڈآتا کمکاری نا ستاءِ کرے و پاکستان و بیلجیئم نا نیام اٹ واپار و زرکاری نا مون آ دننگ کن پاکستان نا عزم انا درشانی ءِ کرے۔ شاہ محمود قریشی پارے کہ پاکستان بیلجیئم تون ہڑتوم آ کنڈآتا شریداری ءِ پین سوگو کننگ و سیاسی، اقتصادی ، واپاری ، تعلیمی، سائنسی و کثیر الجہتی بشخ آتیٹی کمکاری ءِ ودفنگ نا خواہندار ءِ۔ علاقائی حالیت آتیا گپ وتران کرسا وزیرخارجہ پارے کہ پرامن و سوگو اوغانستان نئے بیرہ پاکستان بلکن مچ آ ڈیہہ کن بھاز اہمیت تخک۔ اوپارے کہ اوغانستان اٹی انسانی تنکی نا حالیت آتا مون ءِ توننگ ، زرگزران نا بحالی و دیرپاامن و سوگوی کن جہانی برادری ءِ گچین و سنجیدہ کوشست آتے کاریم اٹ اتوئی مریک۔ وزیرخارجہ پارے کہ اوغانستان اٹی مون آ بروک انسانی تنکی تون مون تننگ، مہاجر آتا ہن و بر نا ممکنہ خطرہ ءِ توننگ و اوغانستان ءِ اسہ وار ولدا دہشت گرد آتا پناہ گاہ جوڑ مننگ آن رکھ تخنگ کن جہانی برادری نا کمک المی ءِ۔ پاکستان جہانی برادری نا چکار ءِ اوغانستان نا مخدوش زرگزرانی حالیت آتا کنڈآ کرفنگ کن 19 دسمبر آ او آئی سی نا وزرائے خارجہ کونسل نا بھلا دیوان نا مہمانداری ءِ کننگ ءِ۔ وزیرخارجہ تینا ہم منصب ءِ بھارت نا کنڈآن مقبوضہ جموں و کشمیر اٹی برجاانسانی حق انا سنگین لتاڑ و ڈیہہ نا امن ءِ مون تروک خطرہ غاتیان معلومدار کرے۔ وزیرخارجہ پارے کہ مقبوضہ جموں و کشمیر اٹی برجا انسانی حق انا پدریسہ خلاف ورزی و کشمیری الس ءِ حق خودارادیت نا فراوانی آن انکار، پاکستان و بھارت نا نیام اٹ تعلقداری تے مست آنبار اتنگ اٹ غٹ آن بھلا اڑاند آک ءُ۔ اوپارے کہ بامعنی گپ وتران نا کسر ءِ آوار کننگ کن بھارت سرکار ءِ تینا 5 اگست 2019 نا غیر کانودی و اسہ کنڈی گام گیج آ نظرثانی کروئی مریک۔ بیلجیئم نا نائب وزیراعظم و وزیرخارجہ صوفی ولمس پاکستان و بیلجیئم نا نیام اٹ ہڑتوم آ کنڈآتا تعلقداری ٹی مثبت پیش رفت آ است جمی نا درشانی و سفارتی کارندہ، جہانی تنظیم تا عملہ، و ایلو درملکی تا کابل آن رکھ کشنگ اٹ پبی کمک فراوان کننگ آ وزیرخارجہ مخدوم شاہ محمود قریشی و پاکستان نا ایلو سرکڑدہ غاتا منت واری ءِ ہرفے۔ اوخاص وڑاٹ آپریشن‘‘ریڈکائٹ’’ نا سرسہب اڈتننگ کن پاکستان نا مخ تفی آ منت واری ءِ ہرفے ، ہراٹی 201 بیلجین شاری تتون اوار 1400 بندغ آتے اوغانستان آن بحفاظت کشنگا۔ یات سلے کہ کم و ود اسہ دہائی آن پد پاکستان نا وزیرخارجہ اسے نا دا اولیکو دورہ بیلجیئم ءِ۔ اومیت ءِ کہ وزیرخارجہ نا ساڑی آ دورہ غان پاکستان و بیلجیئم نا نیام اٹ ہڑتوم آ کنڈآتا تعلقداری پین سوگو مریک۔ وزیرخارجہ بیلجیئم نا نائب وزیراعظم و وزیرخارجہ صوفی ولمس ءِ دورہ پاکستان نا سلہ خلک ہرادے او خوشی اٹ امنا کرسا وزیرخارجہ مخدوم شاہ محمود قریشی نا منت واری ءِ ہرفے۔
