اسلام آباد۔ 07 دسمبر (اے پی پی) وزیراعظم عمران خان پارینے کہ پاکستان نا زرگزرانی ٹک و زرمبادلہ نا کوڑیک سوگو ءُ، اینخو مالی سال انا ایسر آ زرگزرانی شونداری تدوک آ مالی سال آن ہم زیات مننگ نا اومیت ءِ۔ داخیال آتا درشانی ءِ او تینا کماشی ٹی میکرواکنامک سلابتی پڑک نا دیوان آن تران کرساکرے۔ دیوان ءِ ساڑی آ ملکی زرگزرانی و اقتصادی حالیت، میکرواکنامک انڈیکیٹرز اٹ پدریسہ گچینی، ملکی زرگزران ءِ پین سوگو کننگ کن جامع ڈٹ بندی و جہانی کہول آ ودوک آ نہاد آتیان پد ہم زرگزرانی شونداری نا کچ ءِ ودفنگ و پائیدار جوڑ کننگ آ سرجم حوال تننگا۔ دیوان ءِ پاننگاکہ تدوک آ حکومت آتا ودی کروک زرگزرانی تنکی و کورونا نا دین انا سوب آن زرگزرانی مشکل آتا گچین زرگزرانی پالیسی اتون مقابلہ ءِ کننگ آ جہانی کہول آ پاکستان نا پذیرائی مس۔ کورونا نا دین اٹی ہراتم مچ آ دنیا نا ملک آک زرگزرانی مشکل آتا گواچی ئسر، حکومت نا گچین حکمت عملی نا سوب زرگزرانی شونداری نا کچ 3.9 ئس۔ اینخو مالی سال انا ایسر آ پاکستان نا زرگزرانی شونداری نا کچ اٹ تدوک آ سال انا نسبت اسہ درسد پین ودکی نا گمان ءِ۔ حوال اٹ پاننگاکہ ملکی زرمبادلہ نا کوڑیک سوگو ءُ۔ توانائی نا بشخ اٹی اصلاحات نا سوب گردشی وام تیٹی کمتی واقع مسنے۔ ریونیوٹی 35 درسد ودکی، ہراٹی بیرہ خراج نا مد اٹی 32 درسد ودکی، برآمد آتیٹی ودکی، بھلو کچ اسے نا صنعت نا پیدوار و ویلیو ایڈیشن اٹ ودکی ستاکڑزک۔ صنعتی خام مال انا درآمد اٹی ودکی نئے بیرہ صنعتی شونداری بلکن برآمد و ہندی کھپت اٹی ریونیو ٹی ودکی ءِ پک کیک۔ دیوان ءِ ایگریکلچر ٹرانفارمیشن پلان آ پیش رفت و اونا سوب آن پیدوار و برآمد آتیٹی ودکی آہم سرجم معلومدار کننگا۔ داکان بیدس جہانی کہول آ تیل انا نہاد آتیٹی گمانی کمتی نا سوب آن الس اسکان ریلیف سرکننگ اٹ کمکاری آ ہم حوال تننگا۔ دیوان آن تران کرسا وزیراعظم پارے کہ پاکستان نا زرگزرانی ٹک و زرمبادلہ نا کوڑیک سوگو ءُ۔ حکومت نئے بیرہ تدوک آ حکومت نا میرات اٹ ہلوک آ زرگزرانی تنکی بلکن کورونا دین انا سوب آن ودی مروک آ زرگزرانی مشکل آتا گچین وڑاٹ مقابلہ ءِ کرے۔ وزیراعظم پارے کہ داسہ زرگزران پائیدار شونداری نا کنڈآ ہِننگ ءِ۔ بھلو کچ اسے نا صنعت نا پیدوار، ویلیو ایڈیشن، ریونیو و برآمد آتیٹی ودکی پیدوار کیک کہ حکومتی زرگزرانی پالیسیک سہی کنڈآ ہِننگ ءُ۔ اینخو مالی سال انا ایسر آ زرگزرانی شونداری تدوک آ مالی سال آن ہم زیات مننگ نا اومیت ءِ۔ وزیراعظم زرگزرانی سلابتی پڑک نا باسک آتا سلاہ نا خیرمقدم ءِ کرے و زرگزرانی ریلیف ءِ الس اسکان زوت سرکننگ نا گام گیج کننگ نا پارت جاری کرے۔ دیوان اٹ سلاہکار خزانہ شوکت فیاض ترین، وزیر توانائی حماد اظہر، وزیر ڈٹ بندی اسد عمر، خصوصی کمکار ڈاکٹر شہبازگل، گورنر اسٹیٹ بینک رضاباقر، ڈاکٹر راشد امجد، ڈاکٹر سید سلمان شاہ، ثاقب شیرانی، ڈاکٹر اشفاق حسن خان، سیکرٹری خزانہ حامد یعقوب شیخ، چیئرمین ایف بی آر محمد اشفاق احمد، وزارت خزانہ نا اقتصادی سلاہکار ڈاکٹر امتیاز احمد و تعلقدار بڑزکو کمامدارآک بشخ ہلکر وخت اس کہ دیوان اٹی ڈاکٹر عشرت حسین، سید سلیم رضا، ڈاکٹر اعجاز نبی، ڈاکٹر عابد قیوم سلہری و ڈاکٹر ندیم الحق ویڈیو لنک انا کمک اٹ بشخ ہلکر۔
