اسلام آباد۔ 07 دسمبر (اے پی پی) اوغانستان نا وزارت ہائیر ایجوکیشن نا 8 باسکی ڈل بڑزکو تعلیم نا قائم مقام وزیر، الحاق مولوی عبدالباقی نا کماشی ٹی علامہ اقبال اوپن یونیورسٹی نا دورہ ءِ کرے۔ ڈل یونیورسٹی نا وائس چانسلر، پروفیسر ڈاکٹر ضیاء القیوم تون اوغانستان نا تعلیمی ادارہ غاتا تعمیر نوٹی کمک دوئی کننگ آ گپ وتران کرے۔ داوخت آ ڈاکٹر ضیاء القیوم اوغان ڈل ءِ اوغانستان نا تعلیمی نظام و تعلیمی ادارہ غاتا تعمیر نو ٹی پبی کڑد ادا کننگ نا باور کرفے۔ اوپارے کہ اوپن یونیورسٹی اوغانستان نا جامعہ غاتے ڈیجیٹلائزیشن نا عمل اٹ کمک فراوان کننگ، اوغان استاد آتے تربیت تننگ و کورس جوڑ کننگ آن بیدس اوغان طالب علم آتے اوپن یونیورسٹی آن تعلیم دوئی کننگ کن اسکالر شپس فراوان کننگ کن تیار ءِ۔ اوپارے کہ نن خیبرپختونخوا و بلوچستان نا اوغان سیمی علاقہ غاتے ٹی جوڑ یونیورسٹی نا علاقائی دفترآتا کمک اٹ اوغانستان نا مار و مسن تے اُرانا درگہ غا تعلیم نا وارخواہی فراوان کننگ کن تیار اُن۔ وائس چانسلر اوغان ڈل اتون گپ وتران کرسا پارے کہ اوپن یونیورسٹی اوغانستان اٹ ریجنل کیمپس جوڑ کننگ نااست خواہی ہم تخک و دا بابت وزارت تعلیم ءِ سلاہ مون تننگانے ، ہموکان منظور مننگ آ یونیورسٹی اوغانستان اٹ تینا ریجنل کیمپس تفک۔ الحاج مولوی عبدالباقی حقانی تینا تران اٹی پارے کہ اوغانستان نا تعمیر نو اتون تفنگ آ نن علامہ اقبال اوپن یونیورسٹی و خاص وڑاٹ یونیورسٹی نا وائس چانسلر، پروفیسر ڈاکٹر نا منت وار اُن۔ اوغان ڈل اٹی نائب وزیر تعلیمی امور، ڈاکٹر لطف اللہ خیرخواہ،کابل یونیورسٹی ناچانسلر، ڈاکٹر اسامہ عزیز، چیف آف سٹاف،عرفان اللہ عباد، ڈائریکٹر نشریات و معلومداری ، ڈاکٹر دلاور سلاب اور ڈائریکٹر شونداری پروگرام، انجینئر روح اللہ حقانی ئسک اوار ئسر۔دیوان اٹی اوپن یونیورسٹی نارجسٹرا ر، راجہ عمر یونس، چاروں ڈینز، ڈائریکٹر جنرل ریجنل سروسز، انعام اللہ شیخ، کنٹرولر امتحانات و شعبہ داخلہ ناڈائریکٹر آن بیدس ایلو پرنسپل آفیسر آک ہم ساڑی ئسر۔ پاکستانی زبان و ادب ناچئیرمین، ڈاکٹر عبداللہ جان عابد مترجم نا فرض ءِ سرتس۔ جہانی کمک و تبادلہ نا ڈائریکٹوریٹ نا ڈائریکٹر، ڈاکٹر زاہد مجید اوغان ڈل ءِ کو ونیورسٹی نا پروفائل آ سرجم حوال تسر ۔ اوکان پد اوغان ڈل یونیورسٹی ناسنٹرل لائبریری، ریڈیو ٗ ٹی وی سٹوڈیوز، جدید ڈیٹا سینٹر و پرنٹنگ پریس نا دورہ ءِ ہم کرے۔
