اسلام آباد۔ 07 دسمبر (اے پی پی) بنجائی وزیر داخلہ شیخ رشید احمد پارینے کہ انتہاپسندی نا کسر ءِ توننگ کن غٹ ءِ اواری اٹ کڑد ادا کروئی مریک، سیالکوٹ واقعہ غان ملک انا بدنامی مس، نن انتہاپسندی کروک آ واکدار آتا بایدے نفی ءِ کین، جلسہ جلوس اپوزیشن نا حق ءِ، 23 مارچ آ سامان حرب انا ات و در انا سوب آن گڑاس کسرآک بند مریرہ ہنداخاطرآن اپوزیشن تینا فیصلہ غا سجفے، حکومت تینا آئینی مد ءِ پورو کیک و پاکستان اٹ جمہوری عمل مون آ کاہک۔ سے شنبے نادے آ پریس کانفرنس آن تران کرسا وزیرداخلہ پارے کہ انتہاپسندی نا کسر ءِ توننگ کن غٹ اواری اٹ کڑد ادا کیر۔ میڈیا ہاؤس آک دہشت گردی و انتہاپسندی ٹی اوار مخلوق نا ہیت ءِ پیش کپس تو یخین ءِ کہ ملک گچینی نا کنڈآ کاہک۔ اوپارے کہ نن غٹ سیالکوٹ واقعہ نا پبی مذمت ءِ کینہ، داواقعہ غان ملک انا بدنامی مس۔ واقعہ ٹی اوار بندغ آتا برخلاف کانودی کارروائی برجاءِ۔ وزیرداخلہ پارے کہ ننے نئے بیرہ پولیس نا مورال ءِ سپورٹ کروئی ءِ بلکن ہمو واکدار و میڈیا ہاؤس آتا ہم حوصلہ شکنی ءِ کروئی ءِ ہرا انتہاپسندی ءِ تہو ایترہ۔ مچ آ قوم اواری اٹ انتہاپسندی ءِ چٹفنگ نا قول کیر۔ وزیرداخلہ پارے کہ اسہ سال انا کارکڑد ءِ 14 دسمبر آ پیش کینہ۔ اوپارے کہ اوغانستان آن اسہ لکھ 82 ہزار مخلوق ویزہ غا بسنو، 66 ہزار پدی ہنانو و 12 ہزار ملک آن پیشن ہنانو۔ 40 آن 50 ہزار بندغ یواین سی ایچ آر تون رابطہ کرینو۔ اسہ سوج اسے نا ورندی ٹی وزیرداخلہ پارے کہ ہچ ءُ نگران حکومت اس بفک۔ حکومت تینا آئینی مد ءِ پورو کیک و پاکستان اٹ جمہوری عمل مون آ کاہک۔ اسہ پین سوج اسے نا ورندی ٹی اوپارے کہ پی ڈی ایم برانز کن 23 مارچ ءِ گچین کرینے۔ 23 مارچ ءِ پاکستان دے انا وڑاٹ اڈتننگک، یوم پاکستان پریڈ نا تیاری و سامان حرب انا ات و در نا سوب آن 23 مارچ آن منہ دے مست گڑاس کسر تے بند کروئی تمک ہنداخاطرآن اپوزیشن لانگ مارچ انا تاریخ ءِ بدل کے۔ داسکان 23 مارچ اٹی 4 تُو ارے، دابابت 3 تُو آن پد ہیت کیوہ۔ دافک کمپنی نا مشہوری کن ٹائم تننگ ءُ۔ اگہ اوکانود نا کسر ءِ اختیار کریر تو جلسہ جلوس غٹ انا حق ءِ، ولے اپوزیشن یوم پاکستان نا سوب آن لانگ مارچ نا تاریخ نا گچینی آ نظرثانی کے۔ اوپارے کہ ساڑی آ کبینی نا پد اٹ بھاز انگا سوب آک ءُ، اومیت ءِ کہ حکومت چارتُو اسکان کبینی ءِ کنٹرول کیک۔ وزیر داخلہ پارے کہ لاہور نا حلقہ این اے 133نا ضمنی گچین کاری تیٹی کم ٹرن آؤٹ آن اپوزیشن ءِ تینا حیثیت نا اندازہ مسنے ۔ اسہ پین سوج اسے نا ورندی ٹی وزیرداخلہ پارے کہ داسکان گچین کاری مہم اٹ یکونیم سال پین ارے، مخلوق تینا حلقہ غاتیا کاہک، غٹ ءِ راضی کننگ کن اسہ سال اس لگک ، اسہ اسہ حلقہ ٹی چار چار لکھ ووٹرہم ارے۔
