اسلام آباد۔ 07 دسمبر (اے پی پی) پاکستان و آسٹریلیا نا نیام اٹ ہڑتوم آ کنڈآتا واپار نا کچ اٹی برجا مالی سال اٹی نمان ودکی مسنے، مالی سال انا اولیکو چار تُو اٹی آسٹریلیا ءِ پاکستانی برآمد آتیٹی 17.62 درسد وخت اس کہ آسٹریلیا غان درآمد آتیٹی 98.75 درسد نا نمو ریکارڈ کننگانے۔ اسٹیٹ بینک انا کنڈآن جاری کروک حساب وکتاب نا رداٹ برجامالی سال انا اولیکو چار تُو اٹی آسٹریلیا ءِ پاکستانی برآمد آتیٹی تدوک آ مالی سال انا ہندا مدانا مقابلہ ٹی 17.62 درسد نا نمو ریکارڈ کننگا۔ جولائی آن اکتوبر اسکان نا مد اٹی آسٹریلیا ءِ 90.82 ملین ڈالر نا برآمد ریکارڈ کننگا۔ تدوک آ مالی سال انا ہندا مداٹی آسٹریلیا ءِ پاکستانی برآمد آتا کچ 77.21 ملین ڈالر ریکارڈ کننگاسس۔ اکتوبر اٹی آسٹریلیا ءِ پاکستانی برآمد آتا کچ 19.74 ملین ڈالر ریکارڈ کننگا ہراتدوک آ سال اکتوبر اٹی 16.97ملین ڈالر ئسر۔ مالی سال 2021اٹی آسٹریلیا ءِ 269.56 ملین ڈالر نا برآمد ریکارڈ کننگاسس۔ اسٹیٹ بینک انا رداٹ جولائی آن اکتوبر اسکان نا مد اٹی آسٹریلیا غان درآمد آتا کچ 178.27 ملین ڈالر ریکارڈ کننگا ہرا تدوک آ مالی سال انا ہندا مد انا مقابلہ ٹی 98.75 درسد زیات ءُ۔ تدوک آ مالی سال انا ہندا مد اٹی آسٹریلیا غان درآمد آتا کچ 89.69ملین ڈالر ریکارڈ کننگاسس۔ اکتوبر نا تُو اٹی آسٹریلیا غان 33.58 ملین ڈالر نا درآمد ریکارڈ کننگا۔ تدوک آ سال اکتوبر اٹی آسٹریلیا غان 26.20 ملین ڈالر نا درآمد ریکارڈ کننگاسس۔ مالی سال 2021اٹی آسٹریلیا غان درآمد آتیا 381.98 ملین ڈالر نا زرمبادلہ خڑچ مسوسس۔
