اسلام آباد۔6دسمبر (اے پی پی): مزن وزیر عمران خان ءَ گشتگ کہ انوگیں حکومت ءَ نوکیں سپورٹس پالیسی دیما آؤتگ کہ ایشیءَ چہ ورناہ آنی ٹیلنٹ دیما آتکگ اَنت، سپورٹس باڈیز ءِ تہا مافیا ہلاس کنگ بوتگ اَنت، خیبر پختونخوا ءَ 300ء ُ پنجاپ ءَ 260 گراؤنڈ جوڑ کنگ بوتگ اَنت، ہمک یونین کونسل ء،تہا لیب پڑ بہ بنت، نودربرآناں ملک ءِ راج دپترءِتہا درستاں چہ گیش سکالرشپ دیئگ بوتگ، تاں انوں 63 لکھ حقداریں ورناہ آناں 47 ارب کلدار ءِ وظیفہ دیئگ بوتگ۔ اے ھیالانی درشانی آئی ءَ دوشمبے ءِ روچ ءَ جناح سٹیڈیم اسلام آباد ءَ ملک ءِ راج دپترءِتہا درستاں چہ مستریں لیبانی مقابلہ ” سوبمندیں ورناہ سپورٹس ڈرائیو” ءِ بُنگیجی مراگش ءَ گوں تران کنان ءَ کتگ۔ اے موہ ءَ بنجاہی وزیر ڈاکٹر فہمیدہ مرزا، بنجاہی وزیر شفقت محمود ، بنجاہی وزیر حماد اظہر، مزن وزیرءِ حاسیں کمک کار عثمان ڈار ہم ساڑی بوتگ ۔ مزن وزیر ءَ سوبمندیں ورناہ سپورٹس ڈرائیور ءِ بُنگیج کنگ ءَ عثمان ڈار ءَ را دادء ُسلام پیش کتگ۔ آئی ءَ گشتگ کہ ورناہ آنی ھاترءَ لیب ء ُ گوازی باز المی اِنت۔ من 21 سال میاں اوستمانی سپورٹس گراؤنڈءَ گوازینتگ ۔ من ورناہ آناں اے کلو ہ ءَ دیئگ لوٹاں کہ لیب ء ُ گوازی ءَ چہ آ مقابلہ کنگ اھیل کناں۔ ایشی ءَ چہ پیسر مزن وزیر ءَ “مشعل ” روک کتگ ء ُ سپورٹس ڈرائیو ءِ بندات کتگ۔ سوبمندیں ورناہ سپورٹس ڈرائیو ءِ ردءَ ٹیلنٹ ہنٹ ءَ 6 ہزار اتھلیٹس بر زورگ ءَ اَنت۔ پروگرام ءِ ردءَ 4 ارب کلدار ءِ 4 نوکیں منصوبہ بندات کنگ بوتگ اَنت۔ سپورٹس ڈرائیو ءِ ردءَ 15 تا 25 سال ءِ ورناہ کہ آیانی تہا 2700 جنک ہم ہوار اَنت، بازیں لیباں بر زوراں کہ ایشاں چہ ورناہ آنی ٹیلنٹ دیما کایاں ۔
