اسلام آباد۔ 06 دسمبر (اے پی پی) صدر مملکت ڈاکٹر عارف علوی دیر انا کاختی و گلوبل وارمنگ نا مون ءِ توننگ کن مربوط گام گیج کننگ نا گرج آ زور شاغسا پارینے کہ آبی وسیلہ غاتا رکھ و مینجمنٹ کن پین پٹ وپول آن مثبت بھرم دوئی مریک، حکومت ملک اٹی دیر انا ودوک آ کمتی نا ویل انا ایسر کننگ کن پبی کوشست کننگ ءِ۔ اوداخیال آتا درشانی ءِ دوشنبے نادے آ داڑے دیر انا کاریم اٹ اتنگ نا گچین نظام آ جہانی کانفرنس آن تران کرسا کرے۔ کانفرنس اٹی بنجائی وزیر سائنس و ٹیکنالوجی سینیٹر شبلی فراز، پاکستان کونسل آف ریسرچ ان واٹر ریسورسز نا چیئرمین ڈاکٹر محمد اشرف، انٹرنیشنل واٹر مینجمنٹ انسٹیٹیوٹ نا ڈائریکٹر جنرل مارک سمتھ، انسٹیٹیوٹ نا پاکستان اٹ نمائندہ ڈاکٹر محسن حفیظ، انٹرنیشنل واٹر مینجمنٹ انسٹیٹیوٹ نا باسک بورڈ آف ڈائریکٹرز سیمی کمال تون اوار موسمیاتی و آبی چاہندار آک بشخ ہلکر۔ صدر مملکت دود آن تران کرسا پارے کہ مچ آ دنیا ءِ گلوبل وارمنگ و ایلو موسمیاتی چیلنج مون تروک ءِ، حکومت دیر انا کوڑی تا گچینی کن کاریم کننگ ءِ، کشت وکشار نا بشخ اٹی دیر انا گچین کاریم اٹ اتنگ بھاز المی ءِ۔ اوکانفرنس نا اڈتننگ ءِ ستاکڑزوک گوندسا پارے کہ مسکوہی چیف جسٹس دیر انا اسٹوریج نا بابت بھاز کاریم کرے، گلوبل وارمنگ ہم دیر انا کوڑی تیکن ویل اسے، دیر انا کاریم اٹ اتنگ اٹ غٹ ءِ زمواری نا احساس ترفنگے، مہالو تہذیب دریاتتون چلینگاکہ، بلوچستان اٹی سد آ چنکو ڈیم جوڑ مننگ ءِ، اینو دیر ءِ ری سائیکل کننگ نا گرج ءِ۔ صدر مملکت پارے کہ گلوبل وارمنگ و ایلو موسمیاتی چیلنج آتیان کم و زیات پِر فریشانی نا سوب ءِ۔ اوپارے کہ بلوچستان، تھرپارکر و چولستان ءِ دیر انا کاختی نا ویل مون تروک ءِ، کوئٹہ ءِ مسہ سال آن دیر انا سنگین کاختی تون مون تروئی تمنگ ءِ۔ ڈاکٹر عارف علوی پارے کہ بلوچستان اٹ سد آتا کچ اٹ چنکو ڈیم جوڑ مننگ ءِ تانکہ مرمر انگا علاقہ غاتے ٹی دیر ءِ کوڑی کننگ مرے، دیر انا رکھ اکن حکومتی کہول آ گام گیج المی ءِ، کشاری بشخ اتون وابستہ بندغ و بزغرآک ہم دیر انا بچت ءِ تینا شعار کیر۔ اوپارے کہ دیر ءِ بچفنگ کن پبی گام گیج کننگ نا گرج ءِ، وضو کرسا دیر انا کاریم اٹ اتنگ اٹ احتیاط کننگ نا پرمان کننگانے، ساف دیر انا فراوانی و رکھ آن ناجوڑی تیان ہم بچنگ مریک، دنیا نا ایلو ملک آتیانبار پاکستان اٹی ہم دیر انا رکھ اکن سرکاری و غیرسرکاری کہول آ گام گیج آتا گرج ءِ، کراچی ٹی صنعت ءِ ری سائیکل دیر بایدے فراوان کننگے۔ صدر ڈاکٹر عارف علوی پارے کہ پنجاب اٹی ڈغار آن 12 ملین ایکڑ فٹ دیر کشنگک ہراگڑتی نا سوب ءِ۔ صدر پارے کہ گلوبل وارمنگ اٹ تہواٹی دیر انا کچ ودک ہراڑآن کیہی علاقہ غاتیٹی کم و جاگہ اس زیات پِرمریک۔ او2018ء نا واٹر پالیسی ءِ بھاز گچین گوندسا پارینے کہ داڑآ عملدرآمد حکومت نا زمواری ءِ۔ صدر مملکت پارے کہ متکن آ تہذیب آک و شاری آبادیک دریاتا کنارہ غاتیا آباد ئسر و موسمیاتی بدلی نا نتیجہ ٹی ہراتم دا دریاک تینا رخ ءِ بدل کریر تو دا شارک ہم چٹار۔ صدر کانفرنس نا اڈتننگ آ منتظمین آتا منت واری ءِ ہرفسا پارے کہ 1960ء ٹی برصغیر اٹی دیر انا ویل انا ایسری کن سندھ طاس آبی معاہدہ مس، اووخت آ ننا خیال ئس کہ نن تون گنج دیر ارے ولے داسہ حالیت آک دادو کہ دیر انا کاختی ودنگ ءِ، داسہ دنیا ءِ گلوبل وارمنگ مون تروک ءِ، دیر ءِ کوڑی کننگ آن ہم معاملہ ایسر مفک۔ بنجائی وزیر سائنس و ٹیکنالوجی سینیٹر شبلی فراز کانفرنس آن تران کرسا پارے کہ ملک اٹی دیر انا ودوک آ کاختی نا مون ءِ توننگ کن حکومتی ادارہ غاتا اسہ ایلو تون کمک سفت نا قابل ءِ۔ دیر انا ویل حکومت نا اولیت آتیٹی اوار ءِ، ہمالیہ نا ڈیہہ نا گلیشیئر آتا دیر و دنیا نا بھلا ایری گیشن سسٹم آن سندھ و پنجاب سیراب مریرہ۔
