اسلام آباد۔ 06دسمبر (اے پی پی) وزیرخارجہ مخدوم شاہ محمود قریشی پارینے کہ جنونی کیفیت نا مون ءِ توننگ و انتہاپسند سوچ انا اواری اٹ مقابلہ ءِ کروئی مریک۔ دوشنبے نادے آ او آئی سی کونسل آف فارن منسٹرز نا بھلا دیوان و سیالکوٹ اٹ پیش بروک آ است ہسون واقعہ نا بابت اہم بیان اٹی وزیرخارجہ پارے کہ 19 دسمبر آ اسلام آباد اٹی او آئی سی نا وزرائے خارجہ نا بھلو دیوان اس مریک، ہراٹی چندی ملک آتا خصوصی نمائندہ غاتے ہم سلہ خلکونن۔ او آئی سی وزرائے خارجہ دیوان نا ایجنڈااوغانستان ءِ۔ شاہ محمود قریشی پارے کہ اوغانستان نا حالیت آتیا دمدستی چکار کروئی مریک تانکہ اوغانستان نا انسانی تنکی ٹی ودکی مف۔ اوپارے کہ اوغانستان اٹی زرگزرانی تنکی ودی مس تو مضر اثرمرتب مریک۔ وزیرخارجہ پارے کہ سیالکوٹ نا سانحہ بھلو است ہسونی اسے، ہراسیالکوٹ اٹ مس اوبایدے مفروسس۔ اسہ راج اس ہم داوڑنا واقعہ غاتا موکل تفک۔ شاہ محمود قریشی پارے کہ سیالکوٹ نا واقعہ نا جاست وپاست برجاءِ 118 بندغ ءِ دزگیر کننگانے۔ اوپارے کہ کنا سری لنکن وزیر خارجہ تون ہیت مس، وزیراعظم نا سری لنکن حکومت تون ہیت مس، سری لنکن حکومت پاکستانی گام گیج آتیان است جم ءِ۔ سری لنکن حکومت خواہک کہ زموارآتے سزا ملے، ننا ہم ہنداکوشست ءِ کہ زموار آتے اوفتے اوفتا کروک نا سزا تننگے۔ وزیرخارجہ پارے کہ حکومت تون راج ءِ ہم زمواری اداکروئی مریک۔ جنونی کیفیت نا مون ءِ توننگ و انتہاپسند سوچ انا اواری اٹ مقابلہ ءِ کروئی مریک۔
